Read Kahua NA MARAMARÊRAVA 17 Bible Online

NA MARAMARÊRAVA 17 - Kahua bible

NA MARAMARÊRAVA 17

¹Na bani ngêra hagarari henia na marapeha ki teharia na magotoha henigi na hekorekoreani.

²O vaema ni kare ki urusia o karena i ata ni tanu ma renia na kare vurivuri iana i nahuni takoha ma ki page tonganira ngaia ma o karena getera renigi na nahuninga iana, matena i sugi meme.

³Na gi ki hagamatarotarogi na golo ma na siliva. Ma na Araha ki hagamatarotarogi na aitangihata na enoni.

⁴Na enoni era ka vagevagesigi na tamasinga ga erasira na enoni, ma na enoni ni hagaparunga ka vagevagesigi na tamasinga ga hagatoraira na enoni.

⁵Manga go meramarabe na enoni matareha, igo ko guharia God i hagavorara. Na hagaitangiha ki page tarahua na enoni i manavatenia ta na enoni.

⁶Na tarepuri iata na enoni ga gemêa ka na esita, suria ngaira ka ageagesira mangara na kare ga ageagesira na enata.

⁷Na enoni koro ki asa vige hagahagaparu ma na enoni era ki asa vige tamasi oto.

⁸Tani na enoni ka takusia vi na vatevate ki manga na ria, i katora ka akê me maninga tare.

⁹Manga na enoni ma ka obania viga ama ni hemanatanga nga, ki tuguhira viga bonotenigiheri na eraha i berarogata. Manga i mareha, ngaira ka hevoavoa so mareta.

¹⁰Na ramoniha gi tage togo ki girara i hagaotoa na enoni ni takoha, ma tanga na ani i bekabekaga, ki asa, henaka vi na ramoniha tangarê gi tage.

¹¹Na enoni era ga gâga sutaga tare ki asa vige tahi tenia na mera.

¹²Manga go mehetarahu na enoni bekabekaga i arumasigi na tarani ga râ bekabekaga, ngaia ki era matena go mehetarahu na o vasiga ga torera vê na karena tenia.

¹³Manga go barua na koroha renia na eraha, na eraha ki asa vige hato tenia na ruma iamu.

¹⁴Na haganegahana na hetuguriha, ki manga na pepeha ni ve i haganega ki huhuhu. Go rêrapusia rêrê, i era ma ki anuigo.

¹⁵Manga igê na tamasinga ma ka hagaitangia na ani i pe erasia rârâ ta na marâ ma ka naka vê na ani tuguia na tamasinga, na tarana ngekana na Araha ki kitenia ngavê.

¹⁶Manga go vatea na enoni i bekabekaga na haga, hanana i vuria renia na hagesuri iana, igo ko kasi haga purua ma, suria ngaia ki pe vuria na takoha mataha renia.

¹⁷Na enoni ga hemanatange maninga ngaira ka hetakuiheri tare. Igo ko tangara na goamu, hanana ga tamanigo igê na mateni na bagabevoani.

¹⁸Nga noga ma na enoni i bekabekaga kani surusuru, vi barua na hagaba iana na enoni getea.

¹⁹Na enoni i tangasigi tare na hekorekoreani, ngaia ki tangasia nikâ vi bagatauhana. Manga go parêrahaga tare, igo ko hagaratemu renigi na bagabevoani.

²⁰Na enoni i hagamamasiagara na enoni getera, ngaia ki asa iana vige obakoro. Na enoni i hagahagaparu ngaia ki hagaratena marena.

²¹Na enoni i apara na kare i bekabekaga, ngaia ki mamasiaga renia ma ki asa vige vagevagesia.

²²Na obahakoro ki katogo ko apekoro. Manga go obaera tare, na mera ki hagamêgugo.

²³Manga na enoni ga hagakoti ka era ma ka taugi pinihi na vatevate, na suriha ki asa vige oto.

²⁴Na enoni i nahuni takoha ki hagakitagi na katoha iana ma na ani i bekabekaga ki atani ataka mavê.

²⁵Na kare i bekabekaga ki hagabono obaterua na enana ma ki katorerua karu hataera.

²⁶Na enoni ga hagakoti ki pe oto tangara vige katoa na enoni i pe erasia rârâ ta na marâ ke tavotavo haga, se vige hagaitangia.

²⁷Na enoni ni aitangisiha ki asa vige manitavaragi. Na enoni i ototo suria marena, ngaia ki hagabângenia na aitangisiha iana.

²⁸Manga na enoni i bekabekaga ma ki pe bagatatamasi ma ki muni so ma, vari go takusia ma vi ngaia ki pe beka ma ki na enoni ni takoha hete.