Read Kahua NA MARAMARÊRAVA 19 Bible Online

NA MARAMARÊRAVA 19 - Kahua bible

NA MARAMARÊRAVA 19

¹Manga go matareha ma ki korokoro na parongamu, igo ko teharia na enoni ni hagaparunga i hagahagaparu tare.

²Manga go tagara ramo purupuru, igo ko tagara hagaborâ ma. Manga go hagasua, ngaia ki page râ tasi.

³Tani na enoni ka hagaerasira mareta renia na bekaniha iata mareta ma ka hagatoraia na Araha renia.

⁴Manga go ruruguha, na ani ga manatangenigo ka rakorako. Ma ki manga go matareha, ki mareha.

⁵Manga go tohetohe vero igê na tamasinga, na hagaitangiha ki page tarahugo. I asa vi ta na marâ râ nikâ.

⁶Manga go enoni raha, na enoni hato ka gunahia viga manatangenigo. Tagenana ma matena go mamahata.

⁷Na enoni matareha ki asa vige tarahua na hetamaniha tenira na goana. Na enoni i pasina ki asa vige manatangenia. Henaka vi ngaia ki uhungia vi manatangenira ma ngaira ka usisitenia ngavê.

⁸Manga go gunahia na aitangisiha, igo ko korokoro tangago maremu. Manga na aitangisiha ma ki bêngenigo, igo ko akê me maninga.

⁹Manga go tohetohe vero igê na tamasinga, na hagaitangiha ki page tarahugo. I asa vi ta na marâ râ nikâ.

¹⁰I pe araria na enoni i bekabekaga, vige nahuni rako ngavê na ruruguha. I pe araria na enoni vurivuri vige marungira na maneraha.

¹¹Na enoni i nahuni takoha ki asa vige bagamangamangariaga ma ki ageagesia hete vi bonotenia na ani i erasia renia ta na marâ.

¹²Na mangariaganiha iana na maneraha ki manga na ngurunguruha iana na laione, ma na korohana ki manga na kârupu igê na go.

¹³Na kare i bekabekaga ki hagamamasiaga apena o vaemana. Na gete i ama ni varovaro me nga ngaia ki era manga na rangi igê na gerina na ruma i ahari ma ki rangisia o vaniana.

¹⁴Na enamu karu haganahunigo renigi na ruma ma na ruruguha iaterua. Ma na gete ni takoha ngaia ka na mahatanga iana na Araha tangago.

¹⁵Na ani i babaga ki gâga ritova tare. Ngaia ki tâ ma ki mauru ma ki page magê.

¹⁶Na ani i marupegi na ramata iana God ngaia ki page mauri arihu. Ma na ani i pe botage renigi ngaia ki page meme rêrê.

¹⁷Na hetamaniha tangara na enoni ga matareha ki manga na hagaba tanga na Araha ma ngaia ki page vatego na memu renia.

¹⁸Go hagaitangira na karemu, matena ga sisite ma ka pe maravo mêngara. Siana ko nahunahu meme renira.

¹⁹Na enoni i bagamangamangariaga, ngaia ki nungia marena na hagaitangiha. Hagaitangia nga, hanana siana ki page era ngavê.

²⁰Manga go aganarigi na hagaotonga koro ma na hagesuringa koro tangago, hoi, i ta na matena igo ko page tako mataha.

²¹Na enoni ka obania viga katogi na ani mavê na marâ. Nga noga ma na obaniha iana na Araha ki akê me.

²²Na enoni i maongo, ki arari vi maki renia. Na enoni matareha ki koro teharia na ani ni hagaparunga.

²³Manga go hagahigasia na Araha, igo ko page mauri arihu, ki togotogo na aitangihamu ma ko asitatara.

²⁴Na enoni babaga ki tavoa na ngêra igê na apira ma ki bara tanga vige taua akê i harana ke ngêa.

²⁵I arari viga hagaitangia na ani i kasia akê marena, hanana i gasi na maana. Manga go ramonia na enoni ni takoha, ngaia ki aganaria na ramoniha iamu suria i girara vi i tamania na ogaha iana.

²⁶Na kare i hagamamasiaga apena o vaemana ma ki pisua marena renia kenana, ngaia ki hagamakirerua na enana ma ngaia marena ki araria vi i maki ngavê.

²⁷Kakare, manga go usi vigu râ surigi na hagaotonga siana ko rongorongo ma nikâ.

²⁸Manga na enoni era igê na tamasinga ma ki rapasia na ani i metamasi, ngaia ki pe magu vige tohetohe vero, suria na eraha ki mamaki i harana.

²⁹Na hagaitangiha ki bani nanê tanga na ani i bekabekaga ma ki kasia akê marena. Na mata ki bani nanê tanga na gerina.