Read Kahua NA MARAMARÊRAVA 2 Bible Online

NA MARAMARÊRAVA 2 - Kahua bible

NA MARAMARÊRAVA 2

¹Kakare, gu karingagi na hagesuringa iaku. Gu arâ surigi tare na tamasinga iaku.

²Gu aganarigi na takoha mataha ma ko uhungia nga hanana go aitangisigi.

³Nungia nga na giraraha. Avarasia nga na aitangisiha.

⁴Garia maninga nga manga vi ngaia ka na siliva se manga na ruruguha i oga pinihi.

⁵Vikana igo ko page aitangisigi na hagahigasiana na Araha ma na hagesuringa iana God.

⁶Ngaia nga na Araha kani haganahunigo renia na takoha mataha. Tenia ngaia nga kani râ me na morani na giraraha ma na aitangisiha.

⁷Ngaia ki tamanira na ani ga koro ma ka oto na parongata i maana ma ki ngahipusira manga na bêata.

⁸Ngaia ki ngahisira na ani ga katogi ma na tarani ga oto tangara na enoni getera, ma ki anumasira na ani ga toto suria.

⁹Kakare, manga go têtê viteaku, igo ko page aitangisigi na monariha, ma na otoha ma na koroha. Igo ko page girara na ta ki tuguhigo vigo katoa.

¹⁰Na takoha mataha ki page angarigo ma na morana na giraraha ki page katogo ko obâbakoro.

¹¹Na morani na giraraha ma na aitangisiha karu page anumasigo tenigi na eraha,

¹²ma karu page urapusigo tenigi na bagatauha, tenira na enoni ga hagahagaparu, tenira na enoni ga gâga sutaga,

¹³tenira na ani ga pania na tara ni ogaha koro ma ka râ suria ma na tara ni rotohono ni tasi,

¹⁴tenira na enoni ga ageagesigi na bagatauhata ma na hagabekaniha era iata,

¹⁵tenira na enoni, ga bagahagêguri renira ma ki asa vige tongesurira.

¹⁶Kakare, manga go têtê viteaku, igo ko girara go usisi tenia na gete i nakanaka bêna vi megomêru,

¹⁷na gete i pe toto suria o vaniana ma ki pe hagahigasia na suruha iana igê na êragiha.

¹⁸Manga go arâ tanga na ruma iana, igo ko râ suria na tara tanga na mera. Manga go arâ tanga i pasina igo ko râ tanga na agua iata na ani ga bani me.

¹⁹Na enoni i rêra i pasina na gete ngekana, ngaia ki arâ su. Ngaia ki bara vige aporo me tanga na tara tanga na mêriha.

²⁰Vikê ki tuguhigo, go amaka surigi na parongata na enoni koro, ma ko hagabângenia na ogaha i hagakoro obana God.

²¹Na enoni ga koro ma ka oto i maana God ka page ama ni gâga nga igê na agua iaka ikê.

²²Ma na Araha ki page tarigenira hura na enoni ga pe botage renia God. Ngaia ki page pirira akê tenia na agua mangagi na rauga era na enoni ga murisigea na Araha.