Read Kahua NA MARAMARÊRAVA 20 Bible Online

NA MARAMARÊRAVA 20 - Kahua bible

NA MARAMARÊRAVA 20

¹Na tonoha ki katoa na enoni ki rotarota ma ki pe hinaru mamariha. Na enoni i ruguhia na tonoha ki tasitasi na bêna.

²Na maneraha i mangariaga ki manga na laione i ngurunguru. Manga go hagamangaria, igo ko meme.

³Na enoni i pe nahuni takoha ki haganegagi tare na hekorekoreani. Ma ki manga go nakagi vê, na enoni ka hagahigasigo.

⁴Na enoni i marusi vige hasia na mu iana igê na matena tanga, ngaia ki page têtê tara renigi na harisi.

⁵Na hagaotonga koro igê na aitangihana na enoni ki manga na ve igê na ve karu i so ngavê. Manga go nahuni aitangisiha, igo ko girara go okegi hura mave tangago maremu.

⁶Rako na enoni ka vi, vi ngaira ka nahunigi na hetakuiha ma na totosuriha. Ma na ani ga mangara ngegana, kani i he?

⁷Na enoni i koro ma ki oto na parongana, e, na karena ka babarisi ngavê!

⁸Manga na maneraha koro ma ki oga igê na atohana ni suriha, ngaia ki bâsia ototo râ nga, vi i he na eraha.

⁹Ti ki girara i vivi: “Inê kê pe erasia rârâ ta na marâ. I mareha rârâ na tasi i pasiku?”

¹⁰Na Araha ki kitenira na enoni ga hagahagaparu igê na hagahigata ma na hagevovoani matena ga hagavuri se ga vurivuri.

¹¹Igo ko bâbâhagagara renia na kare renigi na tauhana, vi ngaia ki koro se mareha.

¹²Na Araha ki haganahunigia renigi na maaka hanana ga bâbâ ma renigi na karingaka hanana ga rongorongo.

¹³Manga go tâ ma ko mauru, igo ko matareha. Manga go mauru riterite ki aharêsigo na ngêra.

¹⁴Na enoni i vurivuri ki vivi tare: “Ravarava haga! I raha na mena!” Ma na matena i aporo i pasina, ngaia ki ageage, suria i vuria renia na mena i so ngavê.

¹⁵Na golo ma na hê ga raha na meni ka rako teha ma na tamasinga ni aitangisiha ka pe rako, henaka ga teharigi.

¹⁶Igo ko beka, manga go surusuru, vigo barua na hagaba iana na enoni mahuara. Ma ki arari, viga tavogi tenigo na nahuninga iamu, mataro me ko barua na hagaba ngekana.

¹⁷Na ngêra go hanagogi ka ngê koro era vari ma hemuri ki manga na one i haramu.

¹⁸Go tavogi hagenago na hagaotonga ma ka kahu akê me maninga na katoha iamu. Manga go obania vigo haganega na hearihatana, go nahunia nga na katoha koro tanga na hearihatana.

¹⁹Na enoni i bagahagarongo ki asa vige pinihia ta na marâ. Siana ko hakunira na enoni ga tabotabohara tare.

²⁰Manga go arangenirerua na enamu igo ko page meme manga na mangate i meme igê na roto hono.

²¹Na ruruguha ga arâ me rêrê tangago ka hatohato rêrê vige tamanigo.

²²Siana ko vi: “Inê kê page marabaru!” Go hagêguria na Araha. Ngaia ki page hagaotoa tangago.

²³Na Araha ki kitenira na enoni ga hagahagaparu igê na higahigani na marâ, matena ga vurivuri se ga hagavuri.

²⁴Na mêrihana na enoni ki oga i rimana na Araha. Manga i he na enoni ki aitangisia na tara i arâ igê na mêrihana?

²⁵Go takotako maninga hagenago ma ko kahu surusuru tanga God. Manga i mareha, igo ko page tangahurigo, suria i bara tangago vigu hagamonaria.

²⁶Na maneraha i tako mataha ki soso atera na enoni era ma ki pe takotako rugu vige hagaitangira.

²⁷Na aitangiha na Araha i vatea na enoni renia ki manga na laiti i mavesia na obamu ma ki asa vigu gavatenia na aitangiha.

²⁸Na maneraha i korokoro tangara na kariana ma ki tototo surira maninga ngaia ki page maneraha arihu. Na tarani ngegana ka na hunana na arahanga iana.

²⁹Na enoni haoru ka ageagesigi na tê rikitaganiha iata ma na gemêa ka ageagesigi na mêriha arihu iata.

³⁰Na ramusiha raha ki hagakomagago tenia na eraha ma ki katogo ko aitangi.