Read Kahua NA MARAMARÊRAVA 21 Bible Online

NA MARAMARÊRAVA 21 - Kahua bible

NA MARAMARÊRAVA 21

¹Na Araha ki taregi na takoha iana na maneraha manga na enoni i tarea na ve tanga na agua i obania.

²Igo ko takusia vari, vi na parongamu ki oto ma na Araha ki hagakitakita hete na aitangihamu.

³Na tauhamu koro ma oto ka hagakoro obana na Araha teharigi na vogasiha go tagarenigi tanga.

⁴Na paroparoha ma na heruruhiana karu angarira na enoni era. Vikana ngaira ka tasi.

⁵Manga go tagara ramo ma ko takotako maninga igo ko page nahunigi rako na marâ. Manga go hagasua, ngaigi ka page abubu tenigo.

⁶Manga go ruruguha suria vigo hagahagaparu, igo ko uhungia vigo taua na roga. Vikana na mera ki unumigo.

⁷Na enoni era ga oga sutaga ka hagarateta mareta renia na mera, suria ga usi vige paronga koro.

⁸Na enoni ni hagaparunga ka arâ surigi na tarani ga ahiohio ma na enoni ni monariha ka arâ surigi na tarani ga oto.

⁹Na ogaha igê na gerina na ruma ki koro teharia na ogaha i rarona na ruma henia na gete i ama ni varovaro me nga.

¹⁰Na enoni era ka magêsigi tare na eraha. Ngaira ki asa vige takia henaka vi o ti.

¹¹Manga go hagaitangia na enoni paroparo igo ko hagaotoa vari. Manga go hagaotoa na enoni ni takoha, ngaia ki aganarigi na hagaotonga iamu tanga.

¹²Na Araha i koro ma ki oto teha ngavê ki hahutugira na enoni era i ruma iata ma ki page hagamagahurura.

¹³Manga go pe aganarigi na avarasiha iata na enoni ga matareha igo ko page avaravara hagaborâ ma nogamu.

¹⁴Manga ta na enoni ma ki mangariaga tangago ma igo ko vatea pinihi ta na marâ se na haga, na mangariganiha iana ki vatovato.

¹⁵Manga na suriha ma ki oto na enoni koro ka vagevage ma na enoni era ka bubununuga ngavê.

¹⁶Na enoni i pe arâ surigi na takoha koro hanana vige hagaotoa na ogaha iana, ngaia ki page tarahua na mera.

¹⁷Manga vi na mareamu ka na magotoha tare, igo ko page matareha tare. Manga go kasikasi haga tare renigi, igo ki asa vigu nahunia ta na marâ.

¹⁸Na enoni era ga uhungia viga hagamamasiagara na enoni koro, ngaira ka hagarateta renigi na mamasiaganiha. Ngaira ka page mamasiaga urusira na enoni koro.

¹⁹Manga go gâga getego igê na bagamasusu raha, ki koro teharia go gâga henia na gete i mangariaga ma ki varovaro me tare.

²⁰Na enoni ni takoha ka vagevagesigi na ngêra koro ma na mani marâ koro getigi. Ma na enoni i bekabekaga ki kasikasi purua ototo râ nga na haga iana.

²¹Manga go korokoro tangara na enoni ma ko pe hagahagaparura, igo ko page mauri arihu ma na enoni ka page hagahigasigo ma ka page korokoro tangago bê aporo.

²²Na mane ni takoha ki girara i henahuraua na hinua henaka ga rakorako na mane ni me ramo igê. Ngaia ki girara i hogegi na para ni hinua ga hagêgurigi.

²³Go tamasi takotako, i era ma ki takego ta na tarana.

²⁴Na enoni i paroparo ma ki heruruhi ki meramarabe na enoni getera. Ngaia ki purugenia marena igê na tagaraha i hitenia.

²⁵Na obaniha iana na enoni i babaga ki nahuia so marena, suria i usi vige tagara.

²⁶Rako na enoni ka hagatage marâ ma na enoni koro ka votovoto ma ka mahata.

²⁷Na Araha ki kitenigi na vogasiha iata na enoni era ma ki kitenira ngavê manga viga takusira mareta ma igê.

²⁸Siana ko aganarigi na tamasinga iana na enoni ni hagaparunga ma ko aganarigi hete na tamasinga iana na ani i tamasigi ma na marâ i giraragi.

²⁹Na enoni era ka hagabângenia ma, vi ngaira ka koro. Ma na enoni koro ki mareha. Ngaira ka koro monari.

³⁰Na takoha mataha, na giraraha ma na aitangisiha ki asa vige tamania na enoni manga vi God ma ki pe tamania.

³¹Igo ko hagarêra na mane ni me igê na hosi tanga na hearihatana ma na Araha hete kani katogo ko tehateha.