Read Kahua NA MARAMARÊRAVA 22 Bible Online

NA MARAMARÊRAVA 22 - Kahua bible

NA MARAMARÊRAVA 22

¹Na enoni i rongo koro na atana ki teharigi na ruruguha, na golo ma na siliva.

²Na enoni ruruguha ma na ani i matareha karu tagenaterua ma igê ta na tarana: na Araha ki hagavorarerua.

³Na enoni ni takoha ki bâbâ tarana ma ki rukuruku tenigi. Na enoni i pe nahuni takoha ki tari oto râ tangagi ma ki kahu tangahuria.

⁴Na enoni i hagahigasia na Araha ma ki tê viteana ngaia ki page ruruguha ma ki page mauri arihu ma na enoni ka page hagahigasia.

⁵Na tara na enoni era ki arâ suria ki vunu renigi na tone ma na etu. Ma ki manga go tako renia na mêrihamu siana ko arâ igê.

⁶Matena i sisite mênga na kare, go hagesuria manga i he ko hanana na ogaha iana. Ngaia ki page arâ suria igê na ogaha iana hagenani.

⁷Na enoni matareha ki oga i ruguhana na ani i ruruguha. Ma ki manga go kaoni na haga tenia ta na enoni igo ko oga i ruguhana ngaia.

⁸Manga go hasihasi na tarani ga pe oto, na bagabevoani ka page vakavaka tangago ma ko hatohato vigu hagamamasiagara na enoni.

⁹Manga go mahata ko hagangêra na enoni matareha igo ko page akê me bâkoro.

¹⁰Tarigenia hura na enoni i hagavoregi tare na hekorekoreani ma hanana ga hatohato na hekorekoreani, na hemangariha ma na guhata.

¹¹Manga na ogaha iamu ki korokoro ma na tamasinga iamu ka manâhi tare, na maneraha ki manatangenigo.

¹²Na Araha ki katoa na monariha ki tehateha, suria i katoa ki vagavaga mave na hagaparunga.

¹³Na enoni i babaga, ki vivi: “I pe arariê vi ve huhura. Na laione i metara, i era ma ki ngauê.”

¹⁴Na harana na êrâ ki manga na suta, go votavota igê, manga God ma ki mangariaga tangago.

¹⁵Na kere kare ka tanugi na tarani ga arâ bekabekaga. Ramusira ma ngaira ka aitangi.

¹⁶Manga go hagamamasiagara na enoni ga matareha ma ko mahata tangara na ani ga ruruguha, igo ko page hagaratemu maremu.

¹⁷Gu karingê. Inê be hagesurigo renigi na tamasinga iata na enoni ni takoha mataha. Go hagesuringenigi.

¹⁸Manga go pe bonotenigi ma ko girara go tamasigi, igo ko page obakoro.

¹⁹Igo nga kani ve hagesurigo renigi, hanana go hagêguritogo renia na Araha.

²⁰Inê kê bani segegi so na tangahuru gi oru na tamasinga ni takoha mataha.

²¹Ngaigi ka na hagaotonga koro tangago ma ka hagagirarago renia na morana na monariha. Vikana igo ko girara go aramira igê na monariha na enoni ga hagatego.

²²Siana ko hagaerasia na enoni i matareha, suria vi igo ko nahuni ramoha ma ngaia ki mareha. I tagenana ma manga ngaia i gâga igê na tamasinga.

²³Na Araha ki panepane henia ma ki page tavoa râ na mêrihana na ani mavê na enoni i tavoa râ tenia na enoni matareha na marâ i oto tanga.

²⁴Siana ko manatangenia na enoni i bagamangamangariaga,

²⁵i era ma ka tarêhigo na bagatauhana ma ka angarigo.

²⁶Siana ko surusuru vigo barua na hagaba iana ta na enoni.

²⁷Manga i bara tangago vigu barua, vikana ka page rurugu tenigo.

²⁸Siana ko gurua rârâ na girarana na pereperegana na mako na êvarimu ga bani naka.

²⁹Na enoni i manisingenia na tagaraha iana ngaia ki marisina i tagara tanga na maneraha, mareha vi tagara na enoni ga pe araria.