Read Kahua NA MARAMARÊRAVA 23 Bible Online

NA MARAMARÊRAVA 23 - Kahua bible

NA MARAMARÊRAVA 23

¹Manga go arâ ko ngêngê i pasina na enoni raha, go takusia tare vi ngaia ka na enoni raha.

²Manga vi igo ka na enoni go ngêngê raguragu, go ngêngê takotako.

³Siana ko sirisiriga renigi na ngêra mora i nakagi tangago. Vari ngaia ki uhungigo.

⁴Manga go nahuni takoha, siana ko togore apemu vigu ruruguha.

⁵Na haga iamu ka tare mararatana ni, se manga na ahetaronga i reke ki gaha ki râ ngavê.

⁶Siana ko naka na enoni i maongo ki unigo ko ngêngê i pasina. Siana ko sirisiriga renigi na ngêra mora i nakagi tangago.

⁷Ngaia ki vivi: “Gu ngê. U tono.” Ma ngaia ki hagaparu ma, suria i maongo.

⁸Igo ko erasigi na visiha koro iamu tanga ma na tauhana ki katogo ko momoa.

⁹Siana ko erasigi na tamasinga ni takoha koro tanga na enoni i bekabekaga, suria i asa vige ageagesigi.

¹⁰Siana ko urusigi na bani pereperegani na mako. Siana ko parênigi na mako iata na kare banogo,

¹¹suria na Araha raramohaga hunia ki page naka na siva tangago urusira ma ki page megotamasi igê na tamasinga.

¹²Karingagi na hagaotonga koro tangago ma na hagesuringa koro ga vatego renigi.

¹³Siana ko hagêrahu vigu hagaitangia na kare. Na kere ramusiha renia na mata ki asa vige hagamesia,

¹⁴ma ki hagatahia hete vari na mêrihana.

¹⁵Kareku, manga go nahuni takoha mataha, inê kê page ageagesigo.

¹⁶Inê kê page vagevagesigo, matena gê rongogo go tamasigi na takoha mataha.

¹⁷Siana ko hengarira na enoni ga pe botage renia God. Go botage renia hete na hagahigasiana na Araha igê na ogaha iamu.

¹⁸Vikana igo ki asa vigu bagahagêguri, ma ko page vagevagesia hete na ogaha iamu.

¹⁹Kareku, gu karingê. Gu tako mataha ma ku uhungia nga ku bêngenia na ogaha iamu suria na tara koro.

²⁰Siana ko hakunira na enoni ga banganira renigi na vaini ma ka botera renigi na ngêra.

²¹Na enoni ga manga ngegana ka page ragaraga tarata mareta ma ka matareha. Manga go tâ ma ko mauru ma ko ngêngê ma, igo ko page hagesuru kakaga.

²²Go têtê viteaterua na enamu garu aparago. Siana ko makimaki tenirerua matena garu gemêa.

²³Gu vurigi na monariha, na takoha mataha, na giraraha ma na aitangisiha, henaka i raha na meni, ma siana ko hagavuringenigi.

²⁴Na enani kare karu ageagesia na kareterua manga vi i nahuni takoha ma ki paronga koro ma ki ototo.

²⁵Go katorerua na enamu karu ageagesigo ma karu vagevagesigo.

²⁶Kareku, gu karingê maninga, hanana na ogaha iaku ki hagesurigo.

²⁷Na êrâ ma na gete ga gamogamo ka manga na etu go meme igê, se manga na ve karu go vota ko totono igê.

²⁸Ngaira ka mangara na manero ga ahiahi karigo. Ngaira ka katora rako na mane ka gamogamo.

²⁹Ti ki harahara ape tare? Ti ki hagagege tare? Ti ki varovaro me tare? Ti ki hagamamaria marena tare? Ti ki mamêruga tare na maana?

³⁰Ngaira ka na enoni ga totono papasi tare ma ka torarigi na ani mavê na marâ ni tonoha.

³¹Siana ko naka na vaini ki hagaokego, henaka i memera se i babaruru igê na kâkâ se i mamaki.

³²Hemuri igo ko ape era ngavê, manga i garego na ma se i takego na rorogahua.

³³Igo ki asa vigu takotako bâkoro. I bêmu igo ko page bâsigi na ataka mavê na marâ ga hetorariga. Igo ko page tamasi bekabekaga.

³⁴Igo ko page hata manga go oga igê na haka i matavatara, manga go oga igê na geria na ruma na haka i akiki ngavê. Igo ko page momoa.

³⁵Igo ko page tako ko vi: “Ti ki nahuiê? Ti ki rupugiê? Inê kê pe hagare! I arariê vi ve rite. Ma ki tanu hega? Be tono nikâ.”