Read Kahua NA MARAMARÊRAVA 24 Bible Online

NA MARAMARÊRAVA 24 - Kahua bible

NA MARAMARÊRAVA 24

¹Siana ko hengarira na enoni era ma siana ko manatangenira.

²Na eraha ka na marâ iata. Na eraha ma ka huhura me i harata.

³Na takoha mataha ma na aitangisiha karu manga na hunana na ruma.

⁴Manga i gâga na giraraha, na kiboru ka vunuvunu renigi na marâ manini ga bâkoro ma ki raha na meni.

⁵Na enoni i tako mataha ngaia getea ma ki nahuni ramoha. Na aitangisiha iana ka na raramohana.

⁶Bâ, manga go takotako maninga hagenago, igo ko girara go arâ igê na hearihatana. Manga go nahunira rako na enoni ni hagaotonga koro, igo ko page tehateha.

⁷Tanga na enoni i pe nahuni takoha na ara ni takoha mataha ki bara ngavê tanga. Ngaia ki gâga bibi nga igê na hekarigiana.

⁸Manga na eraha ka na marâ iamu, na enoni ka visigo vigo oga sutaga.

⁹Vikana na ani mavê na katoha iamu ki era. Na enoni ka kikitenigo, suria go aharê igê na ara ni tarani.

¹⁰Manga go mameaga matena igê na bagabevoana, igo ko mameaga monari ngavê.

¹¹Tamania na enoni ga suria pe oto hanana vi meme. Gu hagatahia tenia na mera.

¹²Siana ko vi, ‘I mareha vi na tagaraha iaku ngekana’. Suria God i girarago go tamasi monari se mareha. Ngaia ki page vatego renia na memu i araria na tauhamu.

¹³Kareku, na pirui ki mamaki ma ki koro tangago. Na pirui i mamaki i haramu ki tagenana ma manga na takoha mataha i koro tanga na ogaha iamu. Manga go nahuni takoha mataha, igo ki asa vigu bagahagêguri ma ko page akê me bâkoro hete i muri me.

¹⁵Siana ko gamora ni hanago tenia na enoni koro. Siana ko raua na ruma iana tenia.

¹⁶Na enoni koro, henaka i votavota hagarako, ngaia ki girara i aharaga ki rêra aporo tare. Ma na enoni i pe botage renia God, ngaia ki tapasu, ki votavota ma ki asa vige aharaga aporo.

¹⁷Manga na eraha ma ki tarahua na merongamu, siana ko manavatenia. Matena i votavota, siana ki akê na ageagemu renia.

¹⁸Na Araha ki kitenia na hemanavateana. I era ma na mangariaganiha iana ki apariri bê aporo tangago igo.

¹⁹Siana ki marâ na apemu, matena ga tavoraha bâkoro na marâ tangara na enoni era. Siana ko hengarira,

²⁰suria na matena i muri ki page era tangara. Ngaira ka page magahuru.

²¹Kareku, go hagahigasia na Araha ma ko hanetasia na maneraha. Go hinarura na enoni ga guguruga tangarerua.

²²Na hagaitangiha ki nanê ma tangara, ma igia na enoni ka pe girara, vi bagararaha manga i he ka na hagaitangiha tangara.

²³Igê tani nikâ na takoha mataha iata na enoni ni takoha. I pe oto tanga na enoni i hagatamasi vige panepane henia ta apanena.

²⁴Manga i vi tanga na enoni i takea na bevoa, ki vivi, vi pe takea na bevoa, na enoni hato ka page guharia ma ka page kikitenia.

²⁵Ma na enoni i hagatamasi ma ki hagaitangia na enoni i takea na bevoa, ngaia ki page gâga igê na ramana ma na enoni ka page hagarahasia.

²⁶Na aramiha igê na monariha ki na girarana na morana na hemanatangeana.

²⁷Go tagarahigi hagenago na mu, hanana go mauri renigi, ma ko kahu tagarahia na ruma iamu.

²⁸Manga go hagatanga monari igê na kotiha ki na tarana i higa. Siana ko takusia vi ngaia ka na tarana purua ma. Siana ko topegi kê nikâ maremu na tamasinga.

²⁹Siana ko vi, ‘Ngaia ki erasiê, hoi, be erasia bê râ nogaku. Ke hetagenani.’

³⁰Inê kê ri igê na mu ma na pariki ni vaini iana na mane i babaga ma ki pe nahuni takoha.

³¹Ngaigi ki masigu ngavê ma na tone ka rubuhigi. Na para rihigi ka ahogehoge.

³²Matena gê bâsigi, inê kê takotako ma na takoha iaku ki râ vikê:

³³Ua, gu tâ ku mamaro. Ua, gu tâ ku mêru. Ua, gu rumirumigo ku mamaro.

³⁴Hoi, na matena go mauru, na matareha ki arâ me ma ki tarobusigo manga na manero.