Read Kahua NA MARAMARÊRAVA 25 Bible Online

NA MARAMARÊRAVA 25 - Kahua bible

NA MARAMARÊRAVA 25

¹Ikê tani nikâ na maramarêrava iana o Solomone. Na mane ga tagara i ruma iana o Hesekia na maneraha i Jutea ka segegi so.

²Igia ka hagarahasia God, suria i pinihigi na katoha iana. Ma igia ka hagarahasira na maneraha, suria ga visigi mataha na marâ.

³Na takoha iana na maneraha ka mangagi na vavearo se mangagi na rutuni i asi. Igia ka arisigi.

⁴Apegi râ na popona na siliva tenia, matena i rono, hanana i taranina tanga ga tagarahia renia na kâkâ ki bâkoro.

⁵Paira hura na enoni ni hagaotonga era tenia na maneraha, hanana na hunana na arahanga iana ka na otoha.

⁶Matena go arâ i pasina na maneraha, go nakago so maremu ma siana ko gâga so ototo râ nga igê na atohata na enoni raha,

⁷i era ma na maneraha ki vi tangago, ko aharaga tenia na atohana na ani i raha teharigo. I koro hete tangago, manga vi ngaia ma ki vi tangago, ko akê ko gâga igê na atohata na enoni raha.

⁸Manga go bâsia ta na enoni i katoa ta na marâ, siana ko hatani torea ototo râ nga igê na tamasinga, i era ma ngaia ki hagatanga monari renigo, vigo hagaparu. Vikana ko tê tanu mara ta?

⁹Manga ta na marâ i berarogamurua igo ma na tamamu, igamurua so ma kanimurua hagaotoa. Siana ko tokorenigi na marâ na tamamu i hagapêpugo renigi.

¹⁰Manga i mareha, na enoni ka tahetara renigo, vi igo ka na enoni ni bagahagarongo. Vikana na makiha ki asa vige hato tenigo.

¹¹Na tamasinga koro igê na matena tanga ki manga na gai na golo igê na apira na siliva.

¹²Na ramoniha iana na enoni ni takoha tanga na enoni i aganaria, ngaia ki manga na ringi na golo se na bato na golo taranina.

¹³Na enoni tora tamasinga i asa vige hagaparu. Ngaia ki tanga na ani i hagatorangenia manga na ve magarisi ni tonoha igê na matena ni opaha ni harisi, matena i mahanaga na arito.

¹⁴Na enoni ga surusuru hagaparu viga mahata, ngaira ka mangagi na vaha ma na roga ga pe merâ me na rangi.

¹⁵Manga go apeape suria na enoni, henaka vi ngaia ka na maneraha, ngaia ki page ahoro me. Na tamasinga manâhi ki girara i horoa na aitangihana na enoni i usisiga ngavê.

¹⁶Siana ko masumasu aharêngigo renigi na pirui, i era ma ko momoa.

¹⁷Siana ko marigia na tamamu, i era ma ki usisi na apena renigo se i kikitenigo.

¹⁸Na hagatorainga igê na kotiha ki manga na tatapa borahu se na mata se na mage i masi i nahuia na enoni ki meme.

¹⁹Manga go gâga igê na eraha ma ko hagêguria na enoni i pe arari vige hagêguritogo renia, ki tagenana manga go ngê renia na rivomu i hara, se go arâ renia na êgamu i maranga.

²⁰Manga go vagevage ma ko kiki i pasina na enoni i rugu ngavê na obana, ki tagenana manga go tasia râ na gahu iana igê na matena ni maratoha, se i manga go taruhia na maara iana renia na ahu.

²¹Manga i magê na merongamu, gu hagangêa. Manga i mamata na riona, gu vatea ki totono.

²²Vikana ngaia ki page maki ngavê, ma na Araha ki page vurigo.

²³Na bagatabotabohara ki hagavorea nga na mangariaganiha manga na târagina i tarê heroga.

²⁴Na ogaha igê na parema ki koro teharia na ogaha i rarona na ruma henia na gete i varovaro me tare.

²⁵Na rongoha koro tenia na agua hagatê ga bani naasia arihu me noga ki manga na ve magarisi matena i mamata ngavê na riomu.

²⁶Na enoni koro i arâ suria na enoni era, ki manga na ve banga i amera, se na ve karu i oga igê na maeha.

²⁷I pe koro tangago vigu masumasu aharêngigo renia na pirui. I tagenana ma manga vi i pe koro tangago, vigu obanira na enoni viga hagarahasigo tare.

²⁸Na enoni i pe mangariaga takotako ki manga na hinua ga pe pararihia ma ki mataku ma viga taharia.