Read Kahua NA MARAMARÊRAVA 26 Bible Online

NA MARAMARÊRAVA 26 - Kahua bible

NA MARAMARÊRAVA 26

¹Na hagarahasiana na enoni bekabekaga ki pe marisina, manga na maratoha ma na mahananiha, se na rangi ma na arito ru igê na matena ni opaha ni harisi.

²Na arangeniha ki asa vige hagamamasiagago manga vi pe tonga na hunana. Ngaigi ki manga na sigo i hagavato se manga na gapagapa i gaha ki riri.

³Na gue ki tanga na hosi, na pagopago tanga na tonki ma na mata tanga na gerina na enoni i bekabekaga.

⁴Manga go aramia na hagatenga bekabekaga, igo ko bekabekaga manga na enoni i hagate.

⁵Go aramia bekabekaga na enoni i hagate bekabekaga, i era ma ki takusia vi ngaia ki tako mataha.

⁶Manga go hagatora na enoni bekabekaga ki torea na rongoha iamu, igo ko hagaratemu maremu. I ararigo hete vigo bibi.

⁷Na maramarêrava i huhura me tenia na harana na enoni bekabekaga ki pe ramo manga na êgana na enoni i tavi.

⁸Na hagarahasiana na enoni i bekabekaga ki bekabekaga manga na rugiana ni hê igê na hêsigogo.

⁹Na enoni bekabekaga ki asa vige tavoa na maramarêrava. Ngaia ki manga na mane i ruguhia na tonoha ma ki asa vige tavoa râ na sutana na tone i rimana.

¹⁰Na enoni i nakara na enoni bekabekaga ma na ani i pe girarara ka tagara tanga, ngaia ki manga na mane i hanahanasira na enoni hato renigi na mage.

¹¹Tagenana manga na o i aporo ki ngêngê na momâna, na enoni bekabekaga ki ama ni katogi kê nga na tarani ga bekabekaga.

¹²Go girara vari na enoni i takusia vi ngaia ki tako mataha teha ngavê? Hoi, go girara nga vi na enoni bekabekaga ki akê me nga teharia na enoni ngekana.

¹³Na enoni i babaga ki vivi: “I bara ve hura tenia na ruma. Na laione i metara!”

¹⁴Na enoni babaga ki ahorohoro i bea manga na maani ruma i akeke rârâ.

¹⁵Na enoni babaga ki tavoa na ngêra igê na apira ma ki bara tanga vige têa akê i harana ke ngêa.

¹⁶Na enoni babaga ki takusia vi ngaia ki nahuni takoha teharira na verepi na enoni ga nahuni takoha mataha maninga.

¹⁷Manga go totora voro igê na hemerongeana, igo ko manga na enoni i arârâ i tara ma ki ranguirerua na karingana na o vasiga.

¹⁸Na enoni i hagaparua na tamana ma hemuri ki vivi: “Inê kê hagatanugo ma”, ngaia ki manga na enoni bekabekaga i migibare na mage na gi ki hanatenigi rârâ se i arihatenigi rârâ na tarure.

²⁰Hatohato na ario, ki meme na gi. Hatohato na bagatabotabohara, ki magahuru na hekorekoreana.

²¹Tagenana ma na ario ma na maraha ka tarê renia na gi, na ogasutaganiha ki tarê renia na hekorekoreana.

²²Na bagatabotabohara ki mamaki ngavê tangagia. Igia ka unumia ototo râ nga!

²³Na tamasinga ni hagahagabeka ki manga i murina hura na pi na hê i togatoga renia na kere siliva ga taruhia renia.

²⁴Na enoni i hagahagabeka ngaia ki pinihia, vi ngaia ki kitenigo, suria na aitangihana ki era.

²⁵Ngaia ki rongo koro vari, ma siana ko tongesuria, suria i pinihia na eraha igê na aitangihana.

²⁶Henaka vi ngaia ki pinihia maninga na kiteniha iana, ma ngaia ki page huhura me mave igê na bagatauhana.

²⁷Na enoni i sutasuta hekarigi, ki page sutasuta so igê marena. Na enoni i puripuri hê, na hê ka page apuri huria.

²⁸Igo ko hagatoraia na enoni, suria ma go kitenia. Na enoni i hagahagabeka ngaia ki obania ma vi hagaerasia na enoni.