Read Kahua NA MARAMARÊRAVA 28 Bible Online

NA MARAMARÊRAVA 28 - Kahua bible

NA MARAMARÊRAVA 28

¹Na enoni i pe botage renia God ki gavagava, henaka ga pe tarigenia. Ma na enoni i hagahigasia God, ngaia ki apeape asitatara ma ki pe magu manga na laione.

²Manga na enoni ma ka hevoavoa so mareta, ka rakorako na ani ga heparapara vige maneraha. Ma ki manga i gâga na ani gitage na maneraha i tako mataha ma ki nahuni aitangisiha, na enoni ka apeape hatara.

³Na enoni matareha i hagamamasiagara na enoni matareha, ngaia ki manga na rangi ru i sinogi na mu.

⁴Manga igo ma ko pe botage renigi na ramata iana God, igo ko panepane henira na enoni era. Ma ki manga go marupegi, igo ko rêra pusira.

⁵Na enoni era ka pe hagarea rârâ, vi na ta ka na otoha. Ma na ani ga hagahigasia na Araha ka aitangisia maninga.

⁶Manga go matareha ma ki koro na parongamu, igo ko teharia na enoni ruruguha ni hagaparunga.

⁷Na enoni na gapu haoru i marupegi na ramata, ngaia ki nahuni takoha. Ma na ani i manatangenira na ani ni hotonga, ki hagamakia o vaemana.

⁸Manga go hagarakonigi na ruruguha iamu, suria go tuturi, na enoni getea ki page nahunigi na ruruguha iamu, na enoni i mamahata tangara na enoni matareha.

⁹Manga go pe marupegi na ramata, God ki kikitenigi na nunginungiha iamu.

¹⁰Manga go hagabekasia na enoni koro tanga na tarana i era, igo ko hagaratemu maremu. Ngaira ma na enoni ga matarotaro i maana God kaniga babarisi.

¹¹Na enoni ruruguha ki takusia vi ngaia ki tako mataha. Ma na enoni matareha i nahuni takoha ki girara erasia, vi ngaia ki mareha.

¹²Matena na enoni koro ka marungia na agua na enoni igê ka ngerengere vagevage. Ma na matena na enoni era ka marungira, ngaira ka ahiahi tenira.

¹³Manga go pe ranganigo maremu vi igo ko tasi, ki asa iamu vigu page nahunia na ramana. Go ranganigi ma ko nakagi vê. Vikana ka page takigo ma ka page bonotenigi.

¹⁴I babarisi na enoni i hagahigasia na Araha, ma na enoni i ama ni guguruga nga tanga, ki hagaratena marena.

¹⁵Na maneraha i era ma ki marungira na enoni matareha, ngaia ki manga na laione i ngurunguru ni garaniha se manga na o vasiga i gagari.

¹⁶Na maneraha i pe nahuni takoha ki hagamamasiagara na kariana. Ma na ani i kitenia na hagamamasiaganiha ki page maneraha arihu.

¹⁷Na ani i nahunahu enoni ki ama ni gavagava nga mataro me ki meme. Vikana naka ma vê marena!

¹⁸Manga i oto na parongamu igo ko page asitatara, ma ki manga i pe oto na parongamu, igo ko page gasuga ni votavota.

¹⁹Manga go tagara ramo i mu, ka page aharêsigo na ngêra. Manga go oga ma ko tamasi, igo ko page mauri ma renia na roga.

²⁰Na enoni i oto na parongana ki page gâga igê na ramana. Ma ki manga i raharaha i bêmu na haga, hanana vigu ruruguha rêrê, henaka i manga i he, hoi, na hagaitangiha ki page tarahugo.

²¹Na panepaneheniana igê na kotiha ki pe oto. Ma tani ka katokato vikana, henaka na kere vatevate sisite.

²²Na enoni ga hagatage ka tenigi tare na ruruguha ma ka pe hinarua vi na matarehana ki page tarahura.

²³Ramonia na enoni matena i araria. Hemuri ngaia ki page visigo koro renia. Siana ko tamasi sukasuka tanga.

²⁴Na enoni i vivi ‘Hanago tenirerua na enamu ki mareha vige era,’ ngaia ki na tamana na manero.

²⁵Na enoni i hagatage ki hagavoregi ma na hekorekoreani. Na enoni i hagêguritogo renia na Araha, ki page nahunia na ramana.

²⁶Na enoni i arâ surigi na takoha iana marena, ngaia ki bekabekaga. Ma ki manga go arâ surigi na hagesuringa iata na enoni ga tako mataha teharigo, igo ko asitatara.

²⁷Manga go mahata tangara na enoni ga matareha, igo ki asa vigu baguru renigi na marâ go mauri re. Ma ki manga go pe bâsira na ani ga matareha, na enoni rako ka page arangenigo.

²⁸Manga na enoni era ma ka hemarungi, na enoni ka ahiahi. Ma na matena ga votavota, na enoni koro ka hemarungi aporo.