Read Kahua NA MARAMARÊRAVA 29 Bible Online

NA MARAMARÊRAVA 29 - Kahua bible

NA MARAMARÊRAVA 29

¹Manga go ama ni togeaga nga ko usisitenigi na hagaotonga tangago, na hagaitangiha ki page parama ma ki tarahugo, ma ki asa vigu tahi.

²Manga na gavumane ma ki koro, na enoni ka vagevage. Manga na gavumane ma ki era, na enoni ka mamasiaga.

³Manga go têtê suria na takoha mataha, o vaemamu ki ageagesigo. Manga go takuira na êrâ, igo ko page têtê tara renigi na nahuninga iamu.

⁴Manga na maneraha ma ki ototo na parongana, na enoni ka akê me bâkoro. Manga vi ngaia ma ki vanasigi ma na haga, ngaia ki hagaerasia ngavê na agua.

⁵Manga go tamasi sukasuka tanga na tamamu, igo ko naka na etu tanga.

⁶Na enoni era ka votavota igê na basu na bagatauhata, ma na enoni koro ka vagevage ma ka obâbakoro.

⁷Na enoni koro ka giraragi na marâ ga oto tangara na enoni matareha viga nahunigi ma na enoni era ka pe hagaregi rârâ.

⁸Na eragani nuni ki girara i hagagonera na enoni hato i hinua ma na enoni i nahuni takoha ki hagabungira.

⁹Manga na enoni ni takoha ma ki hagakotia na ani i pe nahuni takoha, na enoni i pe nahuni takoha ngekana ki ruru ma, ki ngerengere ma, ma ki guhaguha.

¹⁰Na enoni ni nahunga ni nuni ka kitenira na ani ga koro ma ka oto na parongata, ma na enoni koro ka manatangenira hete.

¹¹Na enoni bekabekaga ka mangariaga mave ma na enoni ni takoha ka piringiape ma ka munigi so ma.

¹²Manga na maneraha ma ki aganarigi na hagaparunga, na gavumane hato iana ka page vora re na enoni ni hagaparunga.

¹³Na enoni matareha ma na ani i hagamamasiaga karu tagenaterua ma vikê: na Araha ki vatererua karu tonga na maaterua.

¹⁴Na maneraha i suria na enoni matareha igê na monariha, ngaia ki page maneraha arihu.

¹⁵Na ramusiha ma na ramoniha karu koro tangara na kare. Manga na kare ma ka arâ suri barisuta ma, ngaira ka page hagamakira kenata.

¹⁶Manga ga rakorako na enoni era ka hemarungi, na eraha ki ama ni akê me nga. Ma na enoni koro ka page bâsira ga votavota.

¹⁷Hagaotoa o karemu ma hanana go page ageagesia tare, suria ngaia ki asa vige page hagamakigo.

¹⁸Manga i mareha na enoni vige tamasigi na ramata iana God, na enoni hato ka page aharê ngavê. Ga babarisi na enoni ga marupegi na ramata iana God.

¹⁹I asa vigu hagaotoa na karemu igê na tamasinga. Vari ngaia ki rongorongogiraragi ma ki asa vige râ surigi.

²⁰Na enoni i pe tamasi takotako ki era teharia na ani i bekabekaga.

²¹Manga go vatea na kariamu na ani mavê na marâ i obania tenigo haganega me matena i sisite, ta na tangiana ngaia ki page teharenigo.

²²Na enoni ga bagamangamangariaga, ngaira ka hagavoregi na hekorekoreani ma ka rakorako na tarani ga pe koro.

²³Manga go paroparo, igo ko page vota. Manga go nakago so maremu, na enoni ka page hagarahasigo.

²⁴Manga na enoni hanago ma ki megotongani na marâ i hanagoa, igo ko hagaratemu maremu, suria manga go tamasia na monariha igê na kotiha, na hagaitangiha ki page tarahugo.

²⁵Manga go takotako bâraha renigi na tamasinga iata na enoni renigo, igo ko tu karigo maremu. Gu hagêguritogo renia na Araha ma ko apeape hatara.

²⁶Na enoni ka uhungia viga manatangenia na ani i nahuni ramoha. Ma ngaia getea ma na Araha ki girara i haganahunigo renigi na marâ i oto tangago.

²⁷Na enoni koro ka mamakuku tenira na enoni era, ma na enoni era ka mamakuku tenira na enoni koro.