Read Kahua NA MARAMARÊRAVA 3 Bible Online

NA MARAMARÊRAVA 3 - Kahua bible

NA MARAMARÊRAVA 3

¹Kakare, siana ko bonotenigi na hagesuringa iaku tangago. Go takusigi tare na marâ gê bonasigo renigi.

²Vikana igo ko page mauri arihu ma ki page aharêsigo na ramana.

³Go taurerua gatagata na hetakuiha ma na totosuriha. Go mahemahe rerirerua i riomu. Gu segererua igê na aitangihamu.

⁴Vikana God ma na enoni ka page vagevagesigo.

⁵Go hagêguritogo renia na Araha i mêrihamu hagenani. Siana ko hagêguria na marâ go takusia vigo aitangisia.

⁶Takusia tare na Araha igê na ara ni marâ go tanugi, ma ngaia ki page hagabâsigo renia na tara koro.

⁷Siana ko takusia, vi igo ko aitangisigi na ara ni marâ. Go têtê viteana na Araha ma ko kikitenigi na eraha.

⁸Vikana igo ko nahunia na meresini koro, i hagamavogi na maara iamu ma ki hagamarumugi na haraniha iamu.

⁹Tagarenigi tanga na Araha na ngêra mora tenigi na mu iamu.

¹⁰Vikana na ruma ni harisi iamu ki page vunu mamasuaga renigi na koni. Na vaini ka page aharêsigo ngavê ma ki mareha ta na marâ vigu karangigi igê.

¹¹Kakare, gu naka na Araha ke hagaotogo. Siana ko mangariaga, matena i ramonigo.

¹²Na Araha ki ramonia na ani ngaia i takuia, manga o vaema ni kare, i ramonia o karena ngaia i takuia.

¹³I babarisi na enoni i tarahugi na takoha mataha ma na aitangisiha.

¹⁴Na takoha mataha ki hagahanego teharigi na golo ma na siliva.

¹⁵Na takoha mataha ki hagahanego teharigi na hê i akê na meni. I mareha rârâ ta na marâ go obania vige maratorana na takoha mataha.

¹⁶Na takoha mataha ki haganahunigo renia na mêriha i arihu henigi na ruruguha ma na hagahigasiana renigo.

¹⁷Na takoha mataha ki girara i katogo ko vagevagesia na ogaha iamu ma ki hagabâsigo renia na tara koro igê na ogaha hagenani iamu.

¹⁸Tanga na ani i ruia na takoha mataha na takoha mataha ki manga na apinige i rasi. Na ani i têa gatagata na takoha mataha ngaia ki vagevage.

¹⁹Na Araha ki hagavora na ano renia na takoha mataha iana. Ngaia ki naka na vavearo igê na atohana renia na giraraha iana.

²⁰Na takoha mataha iana ki katogi na ve ka gogogo ma ki katogi na roto ni rangi ka rangisia na maveta.

²¹Kakare, go taurerua gatagata na takoha mataha ma na aitangisiha iamu. Go mamasurirerua maninga.

²²Ngairerua karu haganahunigo renia na mêriha, karu hagabâkorogo ma karu hagavagevagesigo.

²³Vikana igo ko girara go arâ suri parongamu ma ki asa vigu tapasu.

²⁴I asa vigu magu ni mêru ma ko mauru borebore hete suria na bungiana hagenani.

²⁵I asa iamu vigu magutenigi na bagabevoani ga hagakakangi me manga na enoni ga pe botage renia God ga gasuga me.

²⁶Ngaia nga na Araha kani ngahisigo ma ki anumasigo, hanana siana ko tutu igê na etu.

²⁷Manga i pe bara tangago go vatea na enoni na marâ i oto tanga.

²⁸Siana ko surusuru kê tanga vi i gomaha, manga vigo nahunia.

²⁹Siana ko katoa na tarana i hagamamasiaga, suria ngaia ki hagêguritogo renigo ma ki megobasigu hetanga.

³⁰Siana ko hagatamasia na enoni i pe erasigo rârâ renia ta na marâ.

³¹Siana ko hengarira na enoni ga bagaparongata. Siana ko amake surira.

³²Suria na Araha ki kitenira na enoni ga bagaparongata ma ki manatangenira na ani ga tê viteana.

³³Ngaia ki hagatavagi na ruma iata na enoni ga pe botage renia, ma na korohana ki gahuigi na ruma iata na ani ga tê viteana.

³⁴Ngaia ki meramarabe bê aporo na ani ga memarabe, suria ga paroparo. Ma ngaia ki korokoro tangara na ani ga kasira so mareta ma ka tê viteana.

³⁵Na enoni ka hagahigasira na ani ga tako mataha ma ka koro. Ma na enoni ga bekabekaga ka katora mareta ka maki ngavê.