Read Kahua NA MARAMARÊRAVA 30 Bible Online

NA MARAMARÊRAVA 30 - Kahua bible

NA MARAMARÊRAVA 30

¹Igê na tamasinga iana o Agure o karena o Jake. “God iaku, inê kê guna bâraha. Inê kê uhungia makira ngavê ma inê kê rumakaka.

²Inê ki bono ngavê na bêku. I bâ manga vi inê ki mareha vi na enoni, suria gê pe nahuni takoha.

³Inê kê pe hagesuringenia na takoha mataha. Tahema inê kê pe aitangisia maninga rârâ God.

⁴Ta na enoni ki râ vari i pasina God ma ki aporo me? Ta na enoni ki taua vari na roga i rimana? Se i rumia vari na ve igê na gahu? Ti ki atea na bogona na maveta? Ti kani ngaia? Ti ka no karena? Visia me!

⁵God ki hagamonarigi tare na ara ni tamasinga iana. Ngaia ki manga na bêata tangara na enoni hato ga rukuruku i pasina.

⁶Siana ko nakagi banu me nikâ na tamasinga henigi na tamasinga iana, i era ma ki ramonigo ma ki hagatanga monari renigo, vigo hagaparu.

⁷God iaku, na marâ gi rua kanigê nungigo renirerua. Gu haganahuniê renirerua ma hemuri kê kahu meme.

⁸Tamaniê, siana kê hagaparu. Siana ko nakê kê ruruguha se matareha. Go vateê ma na ngêra go takusia vi arariê.

⁹Manga na ngêra ma ki aharêsiê, vari gê page hagaigago, kê vivi Na Araha, ti kani ngaia? Ma ki manga gê matareha, vari kê page hanago ma kê page hagaerasia na atamu.”

¹⁰Siana ko hagatoraia na enoni vurivuri tanga na avanuna, i era ma ki arangenigo ma ko mamasiaga.

¹¹Tani na enoni ka arangenira o vaemata ma ka tamasi erasira kenata.

¹²Ngaira ka vi, vi ngaira ka matarotaro ma hete ga makoraga ngavê.

¹³Ngaira ka kasira akê mareta ma ka kasira so na enoni getera.

¹⁴Tani na enoni ka hagamamasiagara ngavê na enoni matareha. Ngaira ka tonga re na rivota i masi manga na tatapa borahu se na gê ni ahura ma ka ngaura na enoni i bara tangara.

¹⁵Na namu ki girararerua na tamasinga gi rua ma. Na ani gi tage: Vateê! Na ruata: Vateê!

¹⁶Na marâ ge he ga hagatage ma ki asa vige vivi “Uhu noga”: na agua iata na enoni ga bani me, na gete i gomara, na mako avagavaga i obania na rangi, ma na gi i asa vige vi: “Uhu noga.”

¹⁷Na enoni i memarabe o vaemana se i guguruga ngavê tanga kenana ki araria vi na ahetaronga ka ngaua se na tehe ka akarogi na maana.

¹⁸Na marâ ge he ka hagakoneê ma ki mareha vi ve aitangisigi.

¹⁹Manga i he na ahetaronga ki tarahua na tara iana i vavearo? Manga i he na ma ki tarahua na tara iana igê na hê? Manga i he na haka ki tarahua na tara iana i avoa? Ma manga i he na mane ma na gete karu tarahua na hegirareana?

²⁰Na gete i gamogamo ki vivi, “Inê kê pe katoa rârâ na tarana i era! Tanga ngaia na gamogamoha vari ki na marâ purua ma i manga i ngêngê se i taruhia na harana.

²¹Na tarani ge he na enoni ka usitenigi: na enoni vurivuri ki voravora re na maneraha, na enoni bekabekaga ki ngêngê masu aharêngia, na gete era ki auragi, ma na kere gete rakuraku ki panea râ na avanuna.

²⁴Na marâ mamauri ge he i maveta ka taromega ma ka girara teha ngavê:

²⁵na mangiri, suria ngaira ka rurugi haku na ngêra tanga na matena i marehasira igê na ngêra;

²⁶na kiki, suria ngaira ka pe ramoramo ma ka tagarahigi na robota igê na hê;

²⁷na pê, suria ngaira ka pe nahunia na ani vige bêngenira ma ngaira ka arâ harahara;

²⁸na tata. Igo ko girara go taura i rimamu ma ngaira ka gâga i ruma raha iata na maneraha.

²⁹Na marâ mamauri ge he ka kasikasi uga:

³⁰na laione, suria ngaia ki ramo teharira na marâ hato mamauri ma ki asa hagetage vige magu;

³¹na goti mane ma na kua mane, ma na maneraha i maata na kariana.

³²Manga go hagarahasigo maremu se go mangariaga, go takotako noga ma ko herehere pusia na haramu.

³³Manga go taketake na tavoni na susu, ngaia ki voravora re na totona; manga go tahurua na barisuna ta na enoni, na gapu ki arâ me; manga go hagamangaria ta na enoni, igamurua kamuru page heariha.