Read Kahua NA MARAMARÊRAVA 31 Bible Online

NA MARAMARÊRAVA 31 - Kahua bible

NA MARAMARÊRAVA 31

¹Igê na hagaotonga kenana na maneraha o Lemuele ki vatea renigi:

²“O kareku, o kareku hetakui, inê kê nungia God renigo. Na hagaotonga ta kê vatego renigi?

³Siana ko hagame apemu renira na gete. Siana ko nahu na nahuninga iamu renira, suria rako na maneraha ka vota renira.

⁴Lemuele, gu karinga. Na maneraha ki pe marisita vige totono bâraha na vaini se vige magêsigi na tonoha.

⁵Matena ga totono, ngaira ka bonotenigi na tagaraha iata ma ka pe botage renigi na marâ i oto tangara na enoni ga mamasiaga.

⁶Na tonoha ki marisita na enoni ga sugi meme se tangara na enoni i rugurugu ngavê na obata.

⁷I ararira ngaira vige totono, hanana ga bonotenigi na matareha ma na mamasiaganiha igê na oganiha iata.

⁸Ma igo, ki tuguhigo, vigo panepane henira na ani i bara tangara ma ko roherohe pusira igê na tarani ga oto tangara.

⁹Go roherohe pusira ma ko surira igê na otoha. Go vatera na enoni matareha ma na ani i bara tangara renigi na marâ ga oto tangara hanana viga nahunigi.”

¹⁰Na gete koro, ti ki girara i tarahua? Ngaia ki teharigi na hê bâkoro i raha na meni

¹¹O vaniana ki hagêguritogo renia. Ngaia ki page akê me bâkoro renia ngaia kaniana.

¹²Ngaia ki asa vige hagaera obana o vaniana igê na ogaha iana hagenani. Ngaia ki hagakoro obana hete o vaniana

¹³Ngaia ki aruma tare ki tagarahigi na gahu renigi na varehuta na sipi ma na sigani na rauga, suria i manisingenigi maninga na tagaraha ngegana.

¹⁴Ngaia ki totora me na ngêra hagatê mangagi na haka ga totora me na marâ tenigi na agua hagatê.

¹⁵Ngaia ki bani riterite igê na kahuagana na tangiana hanana i hagamako na ngêra tanga na ruma iana ma ki ategi na tagaraha tangara na kere gete tagara iana.

¹⁶Ngaia ki hahariria na mako i obania ma ki vuria renigi na haga ga votavota i rimana ma ki hasihasi vaini igê.

¹⁷Ngaia ki tagara bâraha tare, suria i ramo ma ki asa vige memega.

¹⁸Ngaia ki girara vi na tagaraha iana ki akê me bâkoro. Ngaia ki ama ni tagara nga ki bungibungi raha.

¹⁹Ngaia ki poroporogi na sigani na rauga ma ki hêrigi marena na gahu.

²⁰Ngaia ki mamahata tangara na enoni matareha, ma ki tamanira na ani i bara tangara.

²¹Ngaia ki pe magutenia na matena ni maratoha suria na ruma iana ka nahunigi na gahu ga mahana renigi.

²²Ngaia marena ki tagarahigi na aruha bâkoro ma ki hagesuru renigi na tuguni siki ma na gahu rotorotoaga memera.

²³O vaniana ki rongo raha na atana i hinua. Ngaia ki na tamata na enoni raha igê.

²⁴Ngaia na gete ki tagarahigi na gahu ma na hogovoro ma ki hagavuringenigi tangara na enoni ni vuriha.

²⁵Ngaia ki ramo ma na enoni ka hagahigasia ma ki pe anumanuma renia na matena i muri me.

²⁶Ngaia ki tamasi takotako ma ka arâ manâhi na hagaotonga iana.

²⁷Ngaia ki aruma tare ma ki marupea maninga na ruma iana.

²⁸Ngaira na karena ka ageagesia ma o vaniana ki kasia akê, ki vi:

²⁹“Rako kaniata na mane ga koro ma igo nga ko teharira ngavê ngaira.”

³⁰Na bâhanana na tauhana na enoni ki girara i hagaparura na enoni ma na bâkorohana na enoni ki magahuru râ. Ma na gete i hagahigasia na Araha ki ararigia viga kasia akê.

³¹Naka ke ageagesia na mena na tagaraha iana. Na hinua hagenani ki araria i hagahigasia.