Read Kahua NA MARAMARÊRAVA 4 Bible Online

NA MARAMARÊRAVA 4 - Kahua bible

NA MARAMARÊRAVA 4

¹Kakare, mu karingagi na hagesuringa iana o vaemami. Mu karinga, hanana mu nahunia na aitangisiha.

²Na hagesuringa iaku tangagamu ki koro. Mu taua gatagata tare.

³Matena gê kere kare mênga, na enaku karu takuiê ngavê.

⁴O vaemaku ki hagesuriê vikê: ‘Go takusia tare na tamasinga iaku. Siana ko bonotenia. Go katoa na marâ gê visia tangago. Vikana igo ko page mauri.

⁵Go gunahirerua na takoha mataha ma na aitangisiha. Ngaia ki na tarana i raha tangago. Siana ko bonotenia.

⁶Siana ko rumakaka renia na takoha mataha, hanana i anumasigo. Gu barigia, hanana i marupego.

⁷Na gunahiana na takoha mataha ma na aitangisiha ngaia ki na tarana i raha ngavê tangago, henaka i pe mataku.

⁸Go barigia na takoha mataha, hanana i hagahanego. Go ruia, hanana i katora na enoni ka hagahigasigo.

⁹Ngaia ki page hagamahego manga vi ngaia ka na tarepuri i bêmu se na mahe i riomu.’

¹⁰Kakare, gu karinga maninga na tamasinga iaku, hanana go page mauri arihu.

¹¹Inê kê bani hagesurigo renia na takoha mataha, renia na tara koro tanga na ogaha iamu.

¹²I mareha rârâ ta na marâ vige hagabarasia na tara tenigo manga vi na takoha mataha ma ki bêngenigo. Ma ki asa vigu tapasu, henaka go tangotango.

¹³Go taua gatagata na hagesuringa ga vatego renia. Na hagesuringa ka na mêriha iamu. Go tanua re vi na rokomu.

¹⁴Siana ko hakunira na enoni ga pe botage renia God. Siana ko amake surira.

¹⁵Siana hagetage! Hinarua na eraha. Ngaritenia ngavê. Siana ko arâ suria na tara ni eraha.

¹⁶Na enoni ga pe botage renia God ki asa vige mêru, manga vi ngaira ma ka pe bagatauhata se ga pe hagamamasiaga ta na enoni.

¹⁷Na eraha ma na oga sutaganiha ka na ngêra ma na tonoha iata.

¹⁸Na ogaha iana na enoni i totosuria God ki manga na arito i marara rârâ mataro me ki raboa ma ki tangitangi.

¹⁹Ma na enoni i pe botage renia God ngaia ki arâ igê na roto hono. Ngaia ki tapasu, ma ki pe girara vi na ta kani tapasu igê.

²⁰Kakare, gu karingê. Gu rongogi na tamasinga iaku.

²¹Gu nakagi igê na aitangihamu ma ku takusigi tare.

²²Vikana ngaigi ka hagakoroa na ogaha iamu ma ko apeapekoro renigi.

²³Go hagatogo suria na aitangihamu, suria na ogaha ki râ suria na aitangihamu.

²⁴Siana hagetage ko hagaparu. Siana na hagaparunga ka huhura me tenia na haramu.

²⁵Vikana igo ko girara go bâbâ rikiriki ma ki asa vigu pinihigi na maamu.

²⁶Go hagatogo surigi na tavo uga iamu, hanana go pupu gatagata.

²⁷Go arage bê ko arâ. Gu hinarugi na eraha.