Read Kahua NA MARAMARÊRAVA 5 Bible Online

NA MARAMARÊRAVA 5 - Kahua bible

NA MARAMARÊRAVA 5

¹Kakare, karingagi na takoha mataha iaku. Gu rongogi na aitangisiha iaku.

²Vikana igo ko girara go hagaotoa na ogaha iamu ma na tamasinga iamu ka page hagabângenia vi igo ko nahunia na aitangisiha.

³Gu hinarua na gete êragi i meramêru na mane. Na gaviharana ki mamaki manga na pirui ma na nunuguha iana ki matari manga na oile ni olive.

⁴Ma i murina ngekana ngaigi ki mahe ngavê ma ki hagamamasiagago.

⁵Ngaia ki bêngenigo tanga na anoano, tanga na agua iata na ani ga bani me.

⁶Na tara i râ suria ki na tara ni mera. Ngaia ki pania na tara ni mêriha. Ngaia ki tarupe ma ki pe girara.

⁷Kakare, mu karingê. Mu tototo surigi tare na tamasinga iaku.

⁸Siana kamu hakunia na gete ngekana. Siana kamu karikari hagarangia na ruma iana.

⁹Manga i mareha, na enoni ki hato vige hagahigasigamu, ma igamu kamu page me karekare, suria na mane i asa iata vige hetaki ka page nahuigamu kamu meme.

¹⁰Ua, na enoni getera ka page nahunigi na ruruguha iami ma na marâ hato mu tagara bâraha renigi.

¹¹Igamu kamu page gegege igê na bea iami ma kamu page meme igê matena i gâga so ma na surimi.

¹²Igamu kamu bagahagêguri ma kamu page gegege raha, kamu vivi: ‘Inê kê ngaritenigi tare na hagesuringa tangê na hagaotonga ma na ramoniha. Inê kê hagahuniê nga mareku!

¹³Inê kê pe bani karingagi na hagesuringa tangê. Inê kê herepusigi ma na karingaku.

¹⁴Ki parama ma kê tahetara, vi inê kê hagamakiê mareku i maata na enoni.’

¹⁵Go totono nga igê na vebanga iamu maremu, i vi, go tototo suria na gete iamu maremu. Go titi ve nga igê na vekaru iamu maremu, i vi, go takuia ngaia getea ma.

¹⁶Na kare ni tara iamu ki asa vige tamanigo, manga na ve tenia na vebanga i atani gogo mavê i tara ma igê na mahera ni ruma.

¹⁷Ngaira nga na karemu kaniga tamanigo igo, mareha vi na enoni getera râ.

¹⁸Go vagevagesia nga hete na gete iamu, na gete go êragia hagâkani.

¹⁹Ngaia ki bâkoro ma ki manâhi. Na gete iamu ke tâ i na aitangihamu. Na hetakuiha iana ke angarigo ngavê.

²⁰Kakare, tanu hega kani vigo tangasia râ na gete iana na mane getea? Tanu hega kani vigo matare râ i susuna na gete iana na mane getea?

²¹I mareha ta na marâ vige pinihi tenia na Araha. Ngaia ki hahutugira tare na enoni, naka ma ga arâ i he.

²²Na enoni i bagaparongana ki naka na tu tanga marena. Ngaia ki tutu igê na basu ni tasi iana marena.

²³Ngaia ki meme, suria i pe hagatogo suria marena. Ngaia ki arâ igê na anoano, suria i bekabekaga ngavê.