Read Kahua NA MARAMARÊRAVA 6 Bible Online

NA MARAMARÊRAVA 6 - Kahua bible

NA MARAMARÊRAVA 6

¹Kakare, i hega, igo ko bani suru vari, vi igo ko barua na hagaba iana na enoni getea?

²I hega, na tamasinga iamu maremu ka pe bani tugo vari? I hega, na suruha iamu maremu ka pe bani rakugo vari?

³E, kakare, vikana igo ko oga i na ababani rimana na enoni ngekana. Hoi, go katokato vikê hanana go huhura: go gaha râ tanga ma ko nungia, hanana i nakago vê ko asitatara.

⁴Hemuri ko kahu tâ ko mauru ma ko mamaro.

⁵Siana ko gâga purupuru. Go huhura tenia na basu manga na manu, se manga na goti vasiga tenia na suta.

⁶Igo na babaga, go boretenira na mangiri manga i he kaniga tagara, hanana go nahuni takoha.

⁷I mareha rârâ ta na hitangita vige bêngenira se vige ramatenira se vige hagaotora.

⁸Bâ, matena i rakorako na ngêra, ngaira ka ruguni ka bêbagi haku, nanê tanga na matena i marehasira igê na ngêra, hanana vige ruguni.

⁹Igo na babaga, go tâ taraha? I keta kanigo aharaga?

¹⁰Igo ko vi: ‘E, ve mêru noga sisite. Be rumigi na rimaku ma be mamaro noga.’

¹¹Ma matena go mêru, na matareha ki gamorahigo manga na manero. Na baguruha ki tarahugo manga na mane hanago.

¹²Na oga ngongogana, na eragani nuni ki tokorenigi na hagaparunga.

¹³Ngaia ki rengasi maa, ki hekaruhi ma na kakêna ki ususu rârâ ma ngaia ki hagahagaparugo ma.

¹⁴Na eraha ki bara i bêna. Ngaia ki varovaro me.

¹⁵Tahema na bagabevoana ki hagagasugania ma ki page hitaria ngavê. Ma ngaia ki asa vige tahi.

¹⁶Na tarani ge ono se gi pi na Araha i makimaki tenigi ngavê:

¹⁷na enoni i paroparo, na enoni ni hagaparunga, na enoni ni nahunga ni enoni koro,

¹⁸na enoni i bara i bêna na eraha, na enoni i gâga sutaga,

¹⁹na enoni i tohetohe vero, se i katora na ahegoata ka hekorekore.

²⁰Kakare, go arâ surigi nga na tamasinga ma na hagesuringa iaterua na enamu. Siana ko bonotenigi.

²¹Go takusigi tare na tamasinga iaterua. Go nakanaka igê na aitangihamu. Gu surugi i riomu.

²²Na hagesuringa iaterua ke bêngenigo i tara, ke anumasigo suria na bungiana ma ke hagaotogo igê na tangiana.

²³Na hagesuringa iaterua ka na laiti mave i mavesia na aitangihamu. Na ramoniha iaterua ka hagabâsigo renia na ogaha koro.

²⁴Ngaigi ka anumasigo tenigi na tamasinga oho iata na gete iata na mane getera.

²⁵Siana ko gahe surigi na bâkorohata. Siana na maata ka hagamugo ma ka angarigo.

²⁶Na êrâ ko vuria renia ma na kere haga i araria na mena na bereti. Ma na gamogamoha, e, igo ko vuria renia na mauriha iamu.

²⁷I hega, na tuguni ki pe nonoro vari, manga go tugunia na anguruna na gi igê na anga igê?

²⁸I hega, na êgamu karu pe titihu vari, manga go pupu igê na garapa?

²⁹Na mêruha henia na gete iana na mane getea ki manga ngekana nikâ, i vi, vi mamasiaganiha. Ti ki mauru henia, e, na hagatotongoha ki arâ me.

³⁰Na enoni ka pe ruhia bâraha na mane i hanago, suria i magê ngavê.

³¹Ma ki manga vigo tarahua, ngaia ki tuguhia, vi vuria na vurina hagepi kê nikâ. Ma vari ki têtê tara renigi na nahuninga hato iana.

³²Na enoni i gamogamo, ki bekabekaga, suria i erasia marena ngavê.

³³Ga page ramusia ma ka page hagamakia ma na makiha ngekana ki gâga henia tare.

³⁴Na hengariana ki katoa o vaniana ki mangariaga ngavê ma ki naka na siva i raharaha ngavê.

³⁵Ngaia ki asa vige aganaria na toto. Na mangariaganiha iana ki asa vige soso, naka ma gi hita na haga.