Read Kahua NA MARAMARÊRAVA 7 Bible Online

NA MARAMARÊRAVA 7 - Kahua bible

NA MARAMARÊRAVA 7

¹Kakare, siana ko bonotenigi na tamasinga iaku. Go takusigi tare na hagesuringa iaku tangago.

²Go arâ surigi hanana go mauri. Go barigigi manga na marâ manimani iamu.

³Go mahemahe renigi manga na rago i rimamu. Go nakagi nga igê na aitangihamu.

⁴Go takusia nga vi na takoha mataha kani kesimu ma na aitangisiha ka na tamamu hetakui.

⁵Ngairerua karu girara garu anumasigo pusira na gete iata na mane getera, henaka ngaira ka hagamugo ngavê.

⁶Ta na matena inê kê ura i ruma iaku igê na mabaha ma kê bâbâ hura.

⁷Inê kê bâsira râ rako na kere mane ga bonoani ma na hitangita gê bâsia, ki bekabekaga ngavê.

⁸Ngaia ki arârâ i tara tanga na matangana na tara i oga igê na ruma iana na êrâ. Ngaia ki aporo tanga i pasina, i ri hagarangia na ruma ngekana.

⁹I bani su na arito ma ki roto.

¹⁰Hoi na gete ngekana ki râ tanga. Ngaia ki tuguni manga na êrâ. Ngaia ki guguni parongana.

¹¹Ngaia ki gatagata ma ki asa vige maki. Ngaia ki garigari mane tare i tara,

¹²se i rêra hekarigi igê na ariruguni na tara se igê na mahera, se igê na tavani hakuta.

¹³Ngaia ki ruia na kere mane ngekana, ki nunugua, ki pe maki ki vi:

¹⁴‘I ngekê, inê kê bani hagamonaria na suruha iaku, hanana gê katoa na vogasiha ni ngêhaku. Vikê inê kê nahunia na ganiana.

¹⁵Inê kê hura me kê bâbâ renigo ma kê tarahugo hete nga!

¹⁶Inê kê vatararangenigi i bea iaku na gahu totoperega ni Esipito.

¹⁷Inê kê kamusia renigi na marâ i sigini koro: na tavoni na mira, na aloe, na sinamone.

¹⁸Hoi, banu me! Karu mauru rârâ ma ki tangitangi. Karu heroro, ke koro na apekerua.

¹⁹O vaniaku ki pe gâga. Ngaia ki bani râ tanga na hinua i hagatê.

²⁰Ngaia ki migirâ rako na haga ma ki gâga vê surirerua na wiki gi rua.’

²¹Vikana na gete ki hagamua ma ki uhungia ma na kere mane ki aganarigi na tamasinga oho iana.

²²Ngaia ki râ suria ototo râ nga. Ngaia ki manga na puruka na vâmavo ga torea viga nahuia, manga na goti vasiga igê na etu,

²³henia na mage i rapu igê na bunaniana, manga na manu igê na basu. Ngaia ki pe girara vi ngaia ki hagaratena na mêriha iana.

²⁴Kakare, mu karingê. Mu rongogi na tamasinga iaku.

²⁵Siana na gete vikana ki hagamugamu. Siana ki tâtâ igê na aitangihami.

²⁶Ngaia ki bani hagamagahurura rako na mane. Ngaia ki bani hagamesira rako teha ngavê.

²⁷Na ruma iana ki na tarâto tanga na matahu, na tara i rere tanga na anoano.