Read Kahua NA MARAMARÊRAVA 8 Bible Online

NA MARAMARÊRAVA 8 - Kahua bible

NA MARAMARÊRAVA 8

¹Rongo! Na takoha mataha ki tamasi raha. Na aitangisiha ki ngere, hanana ga rongorongo.

²Na takoha mataha ki ura igê na botoni na hungani hagarangia na tara ma igê na matangani na tara.

³I na akereni na maani para ni hinua hagarangia na tarâto banu ngaia ki ngere, ki vi:

⁴“Igamu, enoni hato, mu rongoê. Inê kê tamasi tangara na enoni hato i maveta.

⁵Igamu na bonoani, mu uhungia kamu nahuni takoha. Igamu mu bekabekaga, mu uhungia kamu takotako maninga.

⁶Mu rongo, suria gê tamasigi na marâ raha. Inê kê tamasi kê pe hagaparugamu.

⁷Inê kê tamasia na monariha. Inê kê kitenigi ngavê na hagaparunga.

⁸Na ara ni marâ gê visigi ka monari. Inê kê pe hagahagabeka se vi ve toratora tamasinga.

⁹Tanga na ani i nahunia na aitangisiha na ara ni marâ ka rongo mataha tanga. Tanga na ani i nahuni takoha mataha na ara ni marâ ka mave tanga.

¹⁰Mu atea nga na hagesuringa iaku mareha vi na siliva. Mu barigiê nga teharia na golo taranina.

¹¹Inê takoha mataha, inê kê koro teharigi na hê i raha na meni. I berarogani na marâ hato mu barigigi ki mareha rârâ ta na marâ vige maratoraku.

¹²Inê, takoha mataha, inê kê nahunia na aitangisiha. Inê kê nahunigi na giraraha ma na hagakitakitana koro.

¹³Na hagahigasiana na Araha ki vi na kiteniana na eraha. Tahema inê kê kitenigi na paroparoha, na heruruhinga, na bagatauha ma na hagaparunga.

¹⁴Inê kê nahunigi na hagaotonga koro, na hagakitakitana koro, na aitangisiha ma na ramoha.

¹⁵Inê kê tamanira na maneraha ka marungira bâkoro na enoni. Inê kê tamanira na gavumane, ka nakagi na ramata koro.

¹⁶Na ara ni maneraha i maveta, na gavumane ma na ani ga nahuni ramoha inê kê tamanira ka marungira maninga na kariata.

¹⁷Inê kê takuira na ani ga takuiê. Na ani ga gariê, ka girara ga page tarahuê.

¹⁸Na mahatanga iaku ka na ruruguha, na hagahigasiana, na ramana ma na otoha.

¹⁹Na mahatanga iaku ka teharigi na golo ma na siliva taranini.

²⁰Inê kê râ suria na tara na paronga koro, surigi na tara tanga na otoha.

²¹Na ani ga takuiê inê kê haganahunira renigi na ruruguha ga gâga hagahu, ga page aharêsira ngavê.

²²Na Araha ki hagavorê i nago kere vê noga, i nago tarani na ara ni marâ hato.

²³Ngaia ki hagavorê hagenago tatare igê na haganegahani na marâ. Inê kê bani vora me, ma na maveta ki mamênga.

²⁴Inê kê bani vora me, ma na asi ka mamêngagi. Inê kê bani vora me, ma na ve banga ka mamêngagi.

²⁵Inê kê bani vora me, ma na barani ka mamêngagi. Inê kê bani vora me, ma na hungani ka mamêngagi.

²⁶Inê kê bani vora me, ma God ki kahu hagavoragi na ano, na bemu ma na mako, naka ma na kere momogana sisite ngavê.

²⁷Inê kê oga i ngekana, matena ngaia ki naka na vavearo igê na atohana ma ki gasia na taritarihana na asi.

²⁸Inê kê oga i ngekana matena ngaia ki nakagi na vaha i vavearo, ki katogi ka gogogo na maani na asi,

²⁹ma ki bonasigi na asi ka oga tonge igê na pereperegani. Inê kê oga i ngekana, matena i nakagi na gagatani na maveta.

³⁰Inê kê oga henia manga vi inê ka na mane ni hagaotonga iana. Inê kê vagevage ngavê i na ara ni tangiani. Inê kê obakoro ngavê, suria gê oga henia.

³¹Inê kê vagevagesia na maveta. Inê kê vagevagesira na enoni.

³²Tahema kakare, mu karingê. Mu têtê viteaku, hanana mu page vagevage.

³³Mu arâ surigi na hagesuringa tangagamu hanana mu takotako mataha. Siana kamu hagêrahu renigi.

³⁴I babarisi na enoni i têtê viteaku, i rêra i na ara ni tangiani i maani ruma iaku ma ki anumasia na ruma iaku.

³⁵Na enoni i tarahuê, ngaia ki tarahua na mêriha ma na Araha ki page korokoro tanga.

³⁶Na enoni i pe tarahuê, ngaia ki hagaratena marena. Na enoni i kiteniê, ngaia ki takuia na mera.