Read Kahua NA MARAMARÊRAVA 9 Bible Online

NA MARAMARÊRAVA 9 - Kahua bible

NA MARAMARÊRAVA 9

¹Na takoha mataha ki bani tagarahia na ruma iana. Ngaia ki nahunigi na u na hê gi pi.

²Ngaia ki bani nahuira na ganiani. Na vaini mora ka nanê. Na ara ni marâ ka nanê tanga na magotoha.

³Vikê ngaia ki bonasira na kere gete tagara iana ka râ ka tagere igê na rekena na hinua, ma ka ngere ka vi:

⁴‘Igamu mu bonoani, mu râ me! Igamu mu pe nahuni takoha, mu banu me!

⁵Mu ngê na ngêra iaku ma kamu tono na vaini iaku gê bani nanê renigi.

⁶Nakara vê na ani ga bekabekaga hanana mu mauri. Mu arâ suria na tara ni aitangisiha.’

⁷Manga go uhungia vigu hagaotoa na ani i paroparo ngavê, e, ngaia ki page guharigo. Manga go ramonia na ani i erataga, e, ngaia ki page hagamamasiagago.

⁸Siana ko hagaotoa na ani i paroparo ngavê. Ngaia ki page merongasigo renia. Ma ki manga go hagaotoa na ani i tako mataha, ngaia ki page hagahigasigo renia hete.

⁹Na tamasinga iamu tanga na ani i tako mataha ka katoa ki kahu takotako mataha ngavê. Na hagesuringa iamu tanga na ani i tê viteana God ki katoa ki kahu raharaha ngavê na giraraha iana.

¹⁰Manga go obania vigo takotako mataha, ki tuguhigo go hagahigasia na Araha. Manga go obania vigo nahunia na aitangisiha, ki tuguhigo go girara na Araha God.

¹¹Inê, na takoha mataha, kê haganahunigo renia na mêriha arihu.

¹²Manga go tako mataha, igo ko page akê me bâkoro. Ma ki manga go bekabekaga, igo ko hagaratemu maremu.

¹³Na bekabekaniha ka na gete i gatagata, ki pe nahuni takoha ma ki asa vige maki.

¹⁴Ngaia ki gâga i maani ruma iana, se igê na âgâga igê na rekena na hinua.

¹⁵Ngaia ki ngirira na enoni ga riri i ngekana tangagi na tagaraha iata, ki vi:

¹⁶‘Igamu mu bonoani, râ me! Igamu mu pe nahuni takoha, mu banu me!

¹⁷Na ve ga hanagoa ki tono koro teharia na ani getea. Na bereti ga hanagoa ki ngê koro ngavê.’

¹⁸Na ani ga tê viteana ka pe hagare, vi na ani ga bêbanu i pasina ka page meme, ka page arâ tanga na agua iata na enoni ga bani me.