Read Kahua BUKA NI TAKOHA 10 Bible Online

BUKA NI TAKOHA 10 - Kahua bible

BUKA NI TAKOHA 10

¹Na ani gi tage na rango i bani me ki girara i hagamapua na marâ i sigini koro. Na kere bekabekaganiha ki girara i hatungia na takoha mataha, henaka i raharaha teha.

²Na tauhana na enoni ni takoha mataha ki katogi na tarani ga koro, ma na tauhana na enoni ni bekabekaganiha ki katogi na tarani ga era.

³Na enoni mahuara ga mehetarahu i tara, ngaira ka girara ototo râ nga vi ngaia ki bekabekaga. Na enoni hato ka vivi: E, ngaia ki bekabekaga!

⁴Manga na maneraha iamu ma ki mangariaga tangago, siana ko vi, vigo hatohato. Go haritagi ma, i era ma ka akê me na tarani ga erataga ngavê.

⁵Inê kê bâsigi nikâ i maveta ikê tani na tarani i pe oto. Na maneraha kaniga katogi na tarani i pe oto ngegana.

⁶Ngaira ka gurura akê na enoni ga bonobonoga igê na tagaraha raha, ma ka gurura so na enoni ni giraraha.

⁷Inê kê bâsira na enoni rakuraku ga tagirira na hosi manga vi ngaira ka na maneraha, ma na maneraha ka hatare surira, manga vi ngaira ka na kare rakuraku.

⁸Manga go sutasuta hekarigi, vari go suta karigo maremu. Manga go hogea na para, vari na ma ki gagarego.

⁹Manga go papapa hê, vari na hê ki takego. Manga go sitasita ario, vari ki hagamamarigo.

¹⁰Manga na akesi iamu ma ki pangupangu raga ma ko pe ratea, ngaia ki hagame apemu. Tahema ge takotako hagenago na osumu.

¹¹Ata ni vi ma: Igo ko girara vigo hagamanata na ma, hanana siana ki garagara. Manga i garego hato ma ko kahu hagamanata, ki râ hagâbo ma.

¹²Na enoni ka hagahigasia na enoni ni takoha mataha renigi na tamasinga iana, ma na enoni bekabekaga ki erasia marena renigi na tamasinga iana.

¹³Matena i haganega ki tamasi, ngaia ki tamasi bekabekaga sisite ma. Ki arârâ ma ngaia ki kahu tamasi bekabekaga ngavê.

¹⁴Na enoni bonobonoga ki mani tavaragi. I mareha rârâ ta na enoni ge girara, vi na ta kani page akê me nikâ. I mareha rârâ ta na enoni, vige hagarongogia renia vi na ta kani page akê me i murina ga meme.

¹⁵Takusia na enoni i bekabekaga ngavê ma ki pe girara vige aporo i pasina, ngaia ki tagara bâraha rârâ hagaborâ ma, suria i pe nahuni takoha.

¹⁶Na bagabevoana ka tarahua na agua, manga vi na maneraha ki na kere mane haoru ma, ma na gavumane iana ka magoto tare i na ara ni tangiani ma na ara ni bungiani.

¹⁷Ma na agua i babarisi, manga vi ngaia ma ki nahunia na maneraha i nahuni takoha ma ki koro na tauhana ma na gavumane iana ka ngêngê igê ma na mateni tange ma ka hagatogo surira mareta, vi siana ki ruguhira na tonoha.

¹⁸Manga na mane ma ki marusi vige surungia na gerina na ruma iana, na ruma ki aharihari tare ma ki page kakaga ki ahoge.

¹⁹Na magotoha ki katogo ko vagevage ma na vaini ki hagakoro obamu. I monari, ma na haga ma kani tamasi.

²⁰Siana ko visia na maneraha, henaka vi igê na aitangihamu. Siana ko visia na enoni ruruguha, henaka vi pinihi igê na kiboru ni mêruha iamu. Na manu ka hegagahasi, i era ma ka hagarongora renigi na tamasinga iamu. Na tamasinga ka na roga!