Read Kahua BUKA NI TAKOHA 11 Bible Online

BUKA NI TAKOHA 11 - Kahua bible

BUKA NI TAKOHA 11

¹Siana ko magu vigu hagatagarahigi na haga iamu. Vari i ta na matena ko girara ko tavoa na varahani.

²Siana ko hagatagarahigi na haga iamu igê ma na agua gi tage, ma igê hete na agua haritamani se rako, suria go pe girara vi na bagabevoana ta ki page akê me.

³Na apinige, henaka ge baro ke râ i na agua mavê ngaia ki tâtâ nga i ngekana. Matena na roto ka vunuvunu renia na ve, ngaigi ka rangisia na ano.

⁴Manga go obania ma, vigo hasihasi igê na matena, i korokoro ngavê igê na roga ma ki hagagara koro ngavê na ara ni marâ tanga na hasinga, igo ki asa iamu vigu page hasia ta na marâ. Tahema i hemuri ki page asa vige tongasigo na ngauha.

⁵Igo ki asa vigu aitangisia, manga i he kani arâ na roga. Igo ki asa vigu aitangisia na mêriha haoru vi manga i he kani haganega i obana na gete i obara. I tagenana ma igo ko pe aitangisigi na tagaraha iana God, i hagavoragi na ara ni marâ hato.

⁶Go hasihasi i mavoraro ma nikâ i manurahi, suria go pe girara, vi ngairerua hato ka vavaka bâkoro se igê ma na hetangiterua.

⁷I koro tangago vigo vagevagesigi na mavetana na tangiana ma na arito.

⁸Go visia koro God renigi na ara ni harisi go oga surigi. Henaka go mêri arihu, go takusia tare, vi igo ko meme su. I mareha rârâ ta na marâ, vigu naasia, nga noga ma na mera.

⁹Igo na enoni haoru, go vagevagesia na ogaha iamu, matena go karekare. Igo ko obakoro matena go karekare. Go tanugi na marâ go obanigi ma ko arâ surigi na parongamu. Ma ko takusia tare, vi God ki page surigo surigi na ara ni tauhamu.

¹⁰Siana ko takoha bâraha. Go ototo surigo maremu, hanana go apeape koro, suria i asa vigu karekare ke arihu.