Read Kahua BUKA NI TAKOHA 2 Bible Online

BUKA NI TAKOHA 2 - Kahua bible

BUKA NI TAKOHA 2

¹Inê kê tako kê vi: Nakê be obakoro ma be vagevagesia na ogaha iaku. Ma inê kê tarahua, vi na tarana ngekana ki tâ hagâbo ma nikâ.

²Inê kê tarahua vi na ruruha ki na marâ bekabekaga, ma na vagevageha ki tâ hagâbo ma.

³Suria inê kê tenia bâraha na takoha mataha, tahema inê kê tono bâraha na vaini ma kê vagevagesia na ogaha iaku. Ma na bêku ki takotako bâkoro ma. Inê kê kato vikana, suria gê takusia, vi na ogaha bekabekaga vari ki koro tangara na enoni suria na kere matena ga gâga i maveta ikê.

⁴Inê kê tanugi na tagaraha raha. Inê kê tagarahigi na ruma iaku. Inê kê hasigi na pariki na vaini iaku.

⁵Inê kê tagarahigi na mu iaku ma kê hasigi na pariki iaku renigi na ani mavê na apinige ni ngauha.

⁶Inê kê oparigi na ve karu, hanana gê hagavokarigi na apinige gê hasigi.

⁷Inê kê vurira rako na kare rakuraku, na mane ma na gete, ma na kareta ka na kare rakuraku iaku nogata. Inê kê nahunigi na togoha rako teharia na ani mavê na enoni i bani oga hagenago i Jerusaleme.

⁸Inê kê rurugi haku na siliva ma na golo tenigi na kiboru ni ruruguha iata na maneraha igê na agua gê marungigi. Inê kê nahunira na mane ma na gete, ga kiki ka hagakoro obaku ma kê nahunira rako na gete, hanana na mane ka meramêru.

⁹I monari, inê kê ruruguha ma kê raramohaga teharira na ani mavê na maneraha ga marungia i Jerusaleme i nago taraku. Ma na takoha mataha iaku ki tâ.

¹⁰Na ani mavê na marâ gê obania vigê vagevagesia, gê vagevagesia. Inê kê ageagesigi na tagaraha iaku. Ngaigi hato ngegana ka na meku.

¹¹Hemuri inê kê tako renigi na ara ni marâ gê bani katogi, ma ki manga i he kê tagara bâraha renigi, ma kê kahu tahetara, vi ngaigi hato ki oga hagâbo ma. Na tamana ma manga ga uhungia viga taua na roga. I mareha rârâ na varahani.

¹²Bâ, na maneraha ki girara i tanugi ma na marâ ga bani tagarahigi na maneraha hagenago. Vikê inê kê hagateê so mareku, kê vi: Na ta ke vora tangê, manga vi inê be tako mataha, se ve bonobonoga se ve bekabekaga?

¹³Ua, inê kê bani girara, vi na takoha mataha ki koro teharia na bonobonoganiha, manga na marara i koro teharia na mengo.

¹⁴Na enoni i tako mataha, ki mave tarana vi i he ki arâ igê, ma na enoni i bonobonoga ki tarupe igê na mengo. Ma inê kê bani girara nikâ, vi na tarana gi tage ma kani page tarahurerua. Ngairerua karu page meme.

¹⁵Inê kê tako kê vi: Na tarana i tarahua na enoni i bonobonoga, ki page tarahuê nogaku. Hoi, na takoha mataha ki hagavorea tangê na ta? E, i mareha rârâ. I mareha ngavê!

¹⁶Na enoni ka page hitenia na enoni ni takoha mataha, ma na enoni bonobonoga nogana. I hemuri me ngaira ka page hitenigia igia hato. Igia hato ka page me, henaka igia ka tako mataha se ga bonobonoga.

¹⁷Vikana na ogaha iaku ki oga hagâbo ma, suria na ara ni marâ igê na ogaha iaku ka hagamamasiaga apeku ma. Ngaia ki oga hagâbo ma. Na tamana ma vi inê kê uhungia ma vigê taua na roga.

¹⁸Na marâ hato gê tagara bâraha renigi ma na meni na tagaraha iaku ka vora na marâ purua ma tangê, suria gê girara, vigê page panigi so nga tanga na urusiku.

¹⁹Vari na urusiku ki tako mataha se i bonobonoga. Ti ki girara? Henaka, ma ngaia ki page nahunigi na ara ni marâ gê bani tagara bâraha renigi, na marâ hato gê nahunigi suria gê tako mataha. Na ara ni marâ ka oga hagâbo ma!

²⁰Vikê inê kê hagahunu vive bani tagara raha me i nago!

²¹Manga na enoni ma ki tagara raha renia ta na marâ surigi na takoha mataha iana ma na giraraha iana ma na manisingeniha iana, ngaia ki page pania so nga tanga na enoni, i pe tagara rârâ renia. Na tarana ngekana ki râ bekabekaga ma ki pe oto!

²²Manga na enoni i tagara bâraha suria na ogaha iana hagenani ma ki tangotango hepe, na ta kani varahia?

²³Na ara ni marâ i tagarahigi na enoni suria na mêrihana hagenani ka okegi ma me na mamasiaganiha ma na anumanumaha tanga. Henaka igê na bungiani ngaia ki ama ni takoha bâraha nga. Na ara ni marâ ka oga hagâbo ma!

²⁴Na tarana gi tage ma na enoni ki girara i katoa kani ngêngê ma ki totono ma ki vagevagesigi na meni na tagaraha raha iana. Henaka, ma inê kê girara, vi na tarana ngekana ki na katoha iana God.

²⁵Manga i mareha, i asa vige tonga na agana se vige vagevagesia ta na marâ.

²⁶God nga kani haganahunira na ani ga hagakoro obana renigi na takoha mataha, na giraraha ma na vagevageha. Ma na enoni ga haritohea, ngaia ki katora ka tagara bâraha, ka tavogi na meni ma ka nakanaka, hanana i haganahunira renigi na enoni ga hagakoro obana. Na ara ni marâ ka oga hagâbo ma. I ataraha ma ga uhungia viga taua na roga.