Read Kahua BUKA NI TAKOHA 3 Bible Online

BUKA NI TAKOHA 3 - Kahua bible

BUKA NI TAKOHA 3

¹Na ara ni marâ i maveta ikê ka voravora me igê na mateni tange.

²Na matena tanga ga apara kare ma na matena tanga ga meme. Na matena tanga ga hasihasi ma na matena tanga ga opaopa.

³Na matena tanga ga nahunahu enoni ma na matena tanga ga rikira na enoni. Na matena tanga ga hogehoge ma na matena tanga ga totora ruma.

⁴Na matena tanga ga angiangi ma na matena tanga ga ruru. Na matena tanga ga angiangi maramara ma na matena tanga ga mâmâ.

⁵Na matena tanga ga mauru haku ma na matena ga usisiheri. Na matena tanga ga heroro ma na matena tanga ga hemasesi.

⁶Na matena tanga ga garigari ma na matena tanga ga hagatasigi. Na matena tanga ga nakanaka ma na matena tanga ga kasikasi.

⁷Na matena tanga ga tarisigi ma na matena tanga ga turatura aporo. Na matena tanga ga munimuni ma na matena tanga ga tamasi.

⁸Na matena tanga ga hetakuiheri ma na matena tanga ga hekitenigi. Na matena tanga na hearihatana ma na matena tanga na marapeha.

⁹Na ta ka na meni na tagaraha iaka?

¹⁰Inê kê bani giraragi na tagaraha i higa i hagahigegia God renigi.

¹¹Ngaia ki bani nakagi na mateni tange na ara ni marâ. Ngaia ki katora na enoni, ka obania viga giraragi na marâ ga mamêngagi, ma ki pe katora ke aitangisigi maninga na tauhana.

¹²Tahema inê kê takusia, vi na marâ gi tage ma i ararigia nga viga katoa kaniga obâbakoro ma ka vagevage na ogaha iaka.

¹³Igia hato ki ararigia, viga ngêngê ka totono ma ka vagevagesigi na meni na tagaraha raha iaka. Ngaigi ka na mahatanga ga râ me tenia God.

¹⁴Inê kê tahetara, vi na ara ni marâ i tanugi God, ki asa vige page riariaga, ma ka tâtâ hagahu hete, ki bê ki arâ. I bara vige hagatonganigi kê nikâ, se vige hagasibagi. Na tauhana God ki katora na enoni, ka hagahigasia ngavê ngaia.

¹⁵Na ara ni marâ ga vora me i ngekê, ka bani vora me i nago. Ma na ara ni marâ ga page voravora me i hemuri, ngaigi ki bani vora me i nago nogani. God ki katogi na bani marâ, ka ama ni voravora me nga tare ma tarema.

¹⁶Inê kê girara nikâ, vi i maveta ikê na eraha ki oga parea na otoha, ma ka hagaitangira na enoni koro parera na eragani nuni.

¹⁷Inê kê tako kê vi: God ki surira na enoni hato, na ani koro ma na ani ga era, suria na ara ni marâ, henaka vi na ta, ngaigi ki tonga na mateni tange.

¹⁸Inê kê takusia, vi God ki uhungigia, hanana i hagagiraragia, vi igia ma na togoha ma na marâ vigana, ka tagenaka ma.

¹⁹Ma ke bâ! Na marâ, i tarahugia igia na enoni, ki tarahura ngaira nogata. Igia ma ngaira ka meme. Igia tagenaka ka torea na rogaroga gi tage ma. Igia ma ngaira ka tagenaka ma, suria na ara ni marâ ka oga hagâbo ma tangagia, igia ma ngaira.

²⁰Igia na enoni ma ngaira, igia ka soso tagenaka igê na kiru ma ka voravora re na mako. Igia ma ngaira ka râ me tenia na mako ma ka page vora aporo nikâ renia na mako.

²¹Ti ki girara? I monari vari, vi na rogaroga ni mêriha iana na enoni ki aporo i pasina God, ma na rogaroga ni mêriha iata na togoha ma na marâ vigana ka soso i rarona na mako?

²²Tahema inê kê takusia, vi na marâ gi tage ma ki ararigia viga katoa: ga vagevagesigi na meni na tagaraha raha iaka. I mareha vi ta na marâ eâ nikâ. I bara ngavê tangagia ge girara, vi na ta ki page akê me tangagia i murina ga meme.