Read Kahua BUKA NI TAKOHA 4 Bible Online

BUKA NI TAKOHA 4 - Kahua bible

BUKA NI TAKOHA 4

¹Suria na maveta hagenani inê kê bâsira nikâ na enoni ka hagamamasiagara na enoni getera. Na enoni ga mamasiaga, ngaira ka angiangi, ma ki mareha rârâ ta na enoni vige haganaku parongata. I mareha rârâ ta na enoni vige tamanira, suria na enoni ga hagamamasiagara ka nahuni ramoha.

²Tahema inê kê takusia, vi na enoni ga bani me, ka oga maninga teharira na ani ga tahitahi mêngara.

³Ma na ani i mareha ngavê vige vora, ka oga maninga teharira ngaira, na ani ga bani me ma na ani ga tahitahi mêngara, suria ngaira ka pe hatamigi rârâ na mamasiaganiha igê na ogaha i maveta ikê.

⁴Inê kê bâsira nikâ na enoni ga tagara bâraha, hanana viga tehateha. Renia ta? Suria ngaira ka hengarira na enoni getera. Ma na tarana ngekana ki tâ hagâbo ma nikâ. Ngaia ki mara ma ga uhungia viga taua na roga.

⁵I monari, na enoni bonobonoga kani rumirumi rima ma ki mesi magêha.

⁶Henaka vikana, ma ki ararigia viga mamaro sisite taraka, hanana siana ke arumaruma tare ma ke uhungia tare vige taua na roga.

⁷Ta na marâ nikâ gê bâsia i maveta ikê, ki oga hagâbo ma.

⁸Ta na mane ki oga getegetea. Ngaia ki pe apara kare ma ngaia ki na varomu. Ma ngaia ki ama ni tagara raha tare nga. Ngaia ki asa vige togo na aitangihana renigi na ruruguha iana. Ngaia ki tagara bâraha tanga o ti? Tanga o ti kani usi vige tari surigi na tarani ni vagevageha? Na tarana ngekana ki oga hagâbo ma nikâ. Na tarana vikana ki erasia na ogaha iana na enoni.

⁹Na vererua ki koro teharia na vere tagena, suria garu hetamani, hanana na tagaraha iaterua ki akê me maninga.

¹⁰Manga ta na hetangiterua ma ki votavota, na tamana ki girara i ragea aharaga. Ma ki manga na enoni i oga getegetea ma ki votavota, e, i era ngavê, suria i mareha rârâ ta na enoni hanana vige ragea aharaga.

¹¹Igê na rogaroga ahuru, ma na vererua ma karu tâtâ haku karu mauru, ngairerua karu mahanahana. Manga i he ko girara go mahanahana, manga vi igo getegetego?

¹²Na vererua karu girara garu tehateha igê na hearihatana ma tanga na vere tagena ki kere bara. Na varo na gagana gi oru ki bara vige mu.

¹³Na mane na gapu haoru i matareha ma ki takotako mataha, ngaia ki oga maninga teharia na maneraha i gemêa ma ki bekabekaga ma ki usitenigi na hagaotonga iata na enoni.

¹⁴Na mane gê takusia kani manga ikê: I murina i hura tenia na ruma ni hagaitangiha, ngaia ki vora re na maneraha ma ki marungia na agua i vora matareha igê.

¹⁵Na enoni hato ka vagevagesia, suria i page urusia na maneraha.

¹⁶Hagenago na bera na enoni ka raruni togo renia ma hemuri ka raruni era renia. Na ata i rongo raha ki rongo hagâbo ma. Ngaia ki mara ma ga uhungia viga taua na roga.