Read Kahua BUKA NI TAKOHA 6 Bible Online

BUKA NI TAKOHA 6 - Kahua bible

BUKA NI TAKOHA 6

¹I maveta ikê inê kê bâsia ta na eraha nikâ i hagamamasiagara na enoni.

²God ki haganahunia na enoni renigi na ruruguha ma na nahuninga ma na ara ni marâ i obanigi, ma na enoni ka hagahigasia na enoni ngekana. Ma God ki pe naka na enoni ngekana, hanana vige vagevagesigi na marâ ngegana. Ma ta na mahuara hete kani page vagevagesigi ngaia. Na tarana ngekana ki oga hagâbo ma, ma ki pe oto.

³Ta na enoni ki aparara na tangarê gi tage na kare ma ki mêri borahu. Ma ki henaka i mêri borahu, ma ngaia ki pe vagevagesia na ogaha iana, ma na matena i meme, ka pe bagia manga hanana vige marisina. Hoi, inê kê takusia, vi na kere kare i voravora me ma ki meme, ngaia ki hagâvo teharia na enoni ngekana.

⁴Na kere kare ngekana ki vora hagaborâ ma, ma ki magahuru igê na mengo, ma ka hitenia ngavê.

⁵Ngaia ki asa vige bâsia na mavetana na tangiana se vige girara, manga i he ki na ogaha. Ma na tarana gitage ma i vagevagesia: ka na mamaroha.

⁶Ngaia ki vagevagesia teharia na enoni i pe vagevagesia na ogaha iana, i oga surigi na rehagaro gi rua na harisi iana. Bâ, na tarana gi tage ma ki tarahurerua: karu me tagenaterua.

⁷Na enoni ki tagara bâraha tare ma, hanana vi i ngêngê ma ki magê ma.

⁸Na enoni ni takoha mataha na ta kani varahia, teharia na enoni i bonobonoga? Na enoni matareha na ta kani varahia manga i girara vi manga i he kani katoa ki arâ bâkoro na ogaha iana?

⁹Na tarana vikana ki oga hagâbo ma. Ngaia ki tamana ma i uhungia ma vi taua na roga. Siana na enoni ki hagatage ma ki vagevagesigi hete na marâ i bani nahunigi.

¹⁰Na ara ni tarani ga tarahua na enoni, ka bani nakagi me i nago kerevê noga. Igia hato ka bani girara, vi na enoni ki bara vige mehetuguri God, i raramohaga teharia ngaia.

¹¹Henaka gu mehetuguri arihu, na hetuguriana ki râ hagâbo ma. Na ta kani varahigo?

¹²Manga i he na enoni ki girara, vi na ta ki koro tanga igê na kere ogaha abubu iana, i riri manga na mamarugana na vaha? Manga i he na enoni ki girara, vi na ta ki page akê me i maveta i murina i meme?