Read Kahua BUKA NI TAKOHA 7 Bible Online

BUKA NI TAKOHA 7 - Kahua bible

BUKA NI TAKOHA 7

¹Manga vi na atamu ma ki rongo raha, suria vi igo ki koro na parongamu, ngaia ki teharia na bâkorohana na apena na enoni. Ma na tangiana go meme igê ngaia ki koro teharia na tangiana go vora me igê.

²Manga go arâ igê na bagiha ni nuni, ngaia ki koro teharia go arâ igê na magotoha, suria igia hato ki ararigia, viga takusia tare, vi na mera ki naasigia igia hato.

³Na enagiha ngaia ki koro teharia na ruruha. Vari ngaia ki hagarugu obamu, ma vikana ngaia ki katogo hete ko takotako.

⁴Na enoni ni takoha mataha ki takotako renia na mera, ma na enoni i bonobonoga ki takotako tare ma renigi na magotoha.

⁵Na ramoniha iata na enoni ni takoha mataha ki koro tangago teharigi na hagarahasiana iata na enoni bonobonoga.

⁶Na hagarahasiana iata na enoni bonobonoga ka mangagi na marâ ga rarabâga igê na gi. Na tarana ngekana ki oga hagâbo ma.

⁷Manga na hagamamasiaganiha ma ki katoa na enoni ni takoha mataha ki hagahagaparu, ngaia ki paronga manga na enoni i bonobonoga. Manga go aganaria na vatevate, igo ko erasigo maremu.

⁸Na karingaha ki koro teharia ga tamasi. Na piringiapeha ki koro teharia na bagamangamangariaganiha.

⁹Go bâbâ hagenago. Na enoni ga bonobonoga ka bagamangamangariaga tare.

¹⁰Siana ko hagate, ko vivi: “Tanu hega, i nago na marâ ka koro teharia i ngekê?” Na hagatenga ngekana ki râ bekabekaga.

¹¹Na enoni i tako mataha ki teharia na enoni ruruguha. Na tarana ngekana ki tangara na enoni hato. Na takoha mataha ki koro manga na nahuninga banogo go nahunigi.

¹²Na takoha mataha ma na ruruguha karu tagenaterua garu katogo ko apeape tatara. Ma na giraraha ki vatego ta na marâ râ nikâ. Ki manga ikê: Na takoha mataha ki tamanigo maninga igê na ogaha iamu.

¹³Takusigi na marâ God i bani hagavoragi. I asa ta na enoni ge girara, vige hagaotoa na marâ God i hagavora ki ahiohio.

¹⁴Matena na ara ni marâ ka tavoraha maninga tangago, gu vagevage nga. Ma na matena ga tarahugo na mamasiaganiha, gu takusia hete, vi God kani kasirerua me na vagevageha ma na mamasiaganiha. Na enoni ki asa ge girara, vi na ta ki page akê me i hemuri.

¹⁵Na ogaha iaku ki oga hagâbo ma, ma igê inê kê aitangisigi na ara ni marâ. Na enoni ki meme, henaka i pe erasia rârâ ta na marâ, ma na enoni era ki tahitahi, henaka i era ngavê na parongana.

¹⁶Vikana siana ko uhungia nga vigu koro teha, se vigu tako mataha ngavê, i era ma ko nahuigo maremu.

¹⁷Ma siana nikâ ko uhungia vigu erataga ngavê, se vigu bekabekaga ngavê, i era ma ko me bumu.

¹⁸Siana ko arâ bâraha igê ta na apanena se igê ta na apanena. Manga go hagahigasia God, igo ko girara go arâ maninga i guputerua.

¹⁹Na hetamaniha i râ me tenirerua na takoha mataha ma na giraraha tangago, ki raha teharia na hetamaniha iata na tangahuri mane ni hagaotonga tanga na hinua.

²⁰I mareha rârâ ta na enoni i maveta hagenani, vige korokoro tare ma ke pe tasitasi rârâ.

²¹Siana ko karingagi bâraha na marâ na enoni ga visigi, i era ma ko rongoa na kare rakuraku iamu i guharigo.

²²Igo maremu ko girara, vi hagehita, igo ko guharira na enoni getera.

²³Suria inê kê tako mataha, tahema inê kê uhungia vigê tarahugi na monariha igê na ara ni marâ. Inê kê tako, kê vi: E, inê kê obania ve tako mataha! Ma ki bara tangê.

²⁴I mareha rârâ ta na enoni ge girara vi na ta ka na ogaha. Igia ka arisia. I bara ngavê tangagia vige aitangisia maninga.

²⁵Inê kê uhungia ngavê kê hagesuringenia, hanana gê aitangisia. Inê kê uhungia bâraha ngavê, hanana vigê giraragi na aramiha tanga na hagatenga iaku: Renia ta na enoni ga erataga ma na ani ga haritohea God, ka bonobonoga ngavê?

²⁶Rârâ ma kê tarahua ta na tarana i erataga ngavê teharia na mera. Ngaia ka na gete. Ngaia ki na basu. Na hetamaniha iana ki manga na gupena. Na rimana garu ruigo, karu manga na seni i rakugo renigi. Na mane i hagakoro obana God igê na ogaha iana ki girara i tahitahi tenia, ma na mane era ki page tu ngaia.

²⁷Inê na mane ni takoha mataha, inê kê tarahua tatage na tarana ngekana, matena gê bâbâ renigi na aramiha tangagi na hagatenga iaku.

²⁸Inê kê bâbâ renigi na ani getigi na aramiha, ma kê pe tarahugi rârâ. Na vere tage ma na mane tenia na rehagaro gi tage inê kê girara gê hagahigasia, ma na gete ki mareha ngavê.

²⁹Na tarana gê tarahua ki gi tage togo ma. I manga ikê: Matena God ki hagavorara na enoni, ngaira ka koro ma ka haritagi. Ma igia mareka ma kaniga katogi na tarani ga rako ga hetorariga igê na aitangihaka.