Read Kahua ROMANI NA KIHA 1 Bible Online

ROMANI NA KIHA 1 - Kahua bible

ROMANI NA KIHA 1

¹Na romani na kiha iana o Solomone.

²Gu nunuguê. Gu nunuguê nga! Na hetakuiha iamu ki mamaki teharia na vaini.

³Na vanuhamu ki sigini koro ngavê. Na ringena na atamu ki hagarugu obaku. Na kere gete hato ka takuigo.

⁴Gu meêrâ. Karu râ! Igo, maneraha, gu toreê banu igê na kiboru iamu. Igerua karu page vagevage haku. I monari, na hetakuiha iamu ki mamaki teharia na vaini. Tahema na kere gete hato ka takuigo.

⁵Kere gete ni Jerusaleme, henaka gê ape masuri ma inê kê bâkoro ngavê. Gê ape masuri mangagi na ruma na gahu ni Ketare ma kê bâkoro mangagi na gahu totoperega, ga kuharenigi i ruma raha iana o Solomone.

⁶Siana kamu kitakitê renia gê ape masuri, suria na arito ki sinariê. O goaku ka mangariaga tangê ma ka hagatagarahiê igê na mu ni vaini iata. Tahema inê kê pe nahunia na matena, hanana vi ve tako renirerua igê na mu ni vaini iaku ma inê mareku.

⁷Baharamu, gu visia me, vi i he kanigo page bêngenira râ na togoha ka ngêngê igê? I he kanigo hagamamarora igê igê na ritovagana? I era ma kê garigo rârâ i berarogata na tamamu, ga bâsurira nogata na togoha iata.

⁸Baharamu, manga go pe girara, hoi, go harisurira na togoha iaku ma ko kasira na goti iamu kâ ngêngê hagarangigi na ruma na gahu iata na avanuni togoha.

⁹Baharamu, igo ko bâkoro ngavê! Go bâkoro ngavê manga na hosi hehene i okea na kati iana na maneraha.

¹⁰Na mumu ni karinga iamu ga kuku so i parimu ka bâkoro teha ngavê, ma na mahe i riomu nogani.

¹¹Inê be tagarahigi tangago na mumu ni karinga renigi na golo henigi na siliva kukurutaga gê sivirigi.

¹²Matena na maneraha iaku ki tâtâ igê na bea iana, na vanuhana na takana na ago iaku ki unuha ngavê.

¹³Barokona iaku ki tâ i berarogani na susuku manga na barana na tavona na gatoga. I sigini koro ngavê.

¹⁴Barokona iaku ki mangagi na mahe i sigini koro ma ga akê i mu ni mahe i Engeti.

¹⁵Barokomu, go bâkoro ngavê. Na tohomu. Na maamu karu mangarerua na kuvê garu hetakuiheri.

¹⁶Baharamu, Go bâkoro ngavê. Go oga i mangataku. Na go maravarava ka na bea iakerua.

¹⁷Na apinige raha ga rapu oto ka na gerina na ruma iakerua, ma na saru ka na apê ni ruma.