Read Kahua ROMANI NA KIHA 2 Bible Online

ROMANI NA KIHA 2 - Kahua bible

ROMANI NA KIHA 2

¹Inê ka na mahe na mahe ni Sarone na mahe ni maruguni.

²Barokona iaku i berarogata na kere gete ki manga na mahe bâkoro i gupuni na tone.

³Barokona iaku i berarogata na kere gete ki manga na gahiga i gupuni na apinige ni vapu. Inê kê barigia bâraha vi ve oga i mamarugana. Na guani ki mamaki ngavê tangê.

⁴Ngaia ki meêbanu i ruma ni magotoha iana. I ngekana ngaia ki kuharenia igê na gahu na takuiha iana tangê.

⁵Ngaia ki hagangêê renigi na guani na vaini ma ki vateê renigi na guani na gahiga, suria na takuiha ki nahuiê kê haga ni bagama me.

⁶Na rimana na mahana ki tâ i siruguhana na bêku ma na otona ki ruiê.

⁷Kere gete ni Jerusaleme mu suru tangê ma kamu tohe renira na goti vasiga ga asihura ka tangotango, vi siana kamu hagaritea na hetakuiha heri mataro me ki obania ngaia marena.

⁸E, na ringena! Baharana iaku! I arâ me akana! I asireke harêngigi na barani. I gaha harêngigi na hungani.

⁹Barokona iaku ki manga na goti vasiga manga na bêhâgana. I ura noga ikana hagarangia na apê ni ruma. I mamare banu igê na mabaha. I kikirihi banu igê na erahisi.

¹⁰Barokona iaku ki tamasi tangê, ki vi: Barokomu, aharaga. Râ me, baharamu.

¹¹Na matena ni rogaroga ahuru ki hato. Na arito ru ki ura.

¹²I bemu na mahe ka taka igê. Na manu ka angiangi vagevage. Na kuvê ka mumu.

¹³Na guani na fiki ka matâsi. Na vaini ka taka ka sigini koro. Aharaga, barokomu. Râ me, baharamu.

¹⁴Kuvê iaku, go manga go rukuruku igê na hegena na hê. Hura me! Tamasi me! Na ringemu ki rongo koro iaku. Na maamu ki bâkoro iaku.

¹⁵Têra na o vasiga, na kere o vasiga, ga erasigi na mu ni vaini na mu ni vaini iakerua ga taka.

¹⁶Barokona kani iaku ma inê kani iana. Ngaia ki hagangêra na togoha iana i gupuni na mahe.

¹⁷Igê na manurahitagana i magaroha, matena i taketake arârâ na arito, gu râ me, barokomu, manga na goti vasiga manga na bêhâgana igê na hungani i Betere.