Read Kahua ROMANI NA KIHA 3 Bible Online

ROMANI NA KIHA 3 - Kahua bible

ROMANI NA KIHA 3

¹I na ara ni bungiani, matena gê mauru, inê kê marute, vigê garia barokona iaku ma kê gari makira renia.

²Inê kê gari rârâ i hinua raha surigi na tara ma na mahera igê. Inê kê bâbâ renia baharana iaku ma kê gari makira.

³Na mane ga arârâ pusia na hinua ka tarahuê ma inê kê hagatera, kê vi: ‘Mu tarahua vari baharana iaku?’

⁴Pusina ma gê panira, inê kê tarahua baharana iaku. Inê kê ranguia ma kê têa gatagata so. Inê kê merâ i ruma iana kenaku ma kê mebanu i na kiboru gê vora igê.

⁵Kere gete ni Jerusaleme, mu suru tangê ma kamu tohe renira na goti vasiga ga asihura ka tangotango, vi siana kamu hagaritea na hetakuiha heri mataro me ki obania ngaia marena.

⁶Na ta kani arâ me akana tenia na masusu i manga na robona na gi i akê ototo i sigini manga na tavona na gatoga manga na marâ i sigini koro?

⁷O Solomone ki râ me. Ga tugia igê na âgâga iana. Na mane ni me tangahuru ge ono ka anumasia. Ngaira ka na mane ni me i Isiraele ga ramo teha ngavê.

⁸Ngaira ka manisingenigi na tatapa borahu ma ka aitangisigi maninga na hearihatana. Ngaira ka here nanê renigi na tatapa borahu i kâta, suria hagare ma ta na tahariha igê na bungiana.

⁹Na âgâga iana na maneraha o Solomone ka tagarahia renigi na apinige i Libanone.

¹⁰Na u ga têa akê na gahu i avorana ka tagarahigi renigi na siliva. Na gahu i avorana ga turagi igê na golo. Na gahu igê na âgâga iana ki rotorotoaga memera, ga tagarahia na gete ni Jerusaleme suria ga takuia.

¹¹Kere gete ni Jerusaleme mu râ vurusia o Solomone kamu bâsia na maneraha. I bêna ki oga igê na tarepuri kenana i naka i bêna igê na tangiana i êragi moramora igê, na tangiana na vagevageha raha iana.