Read Kahua ROMANI NA KIHA 4 Bible Online

ROMANI NA KIHA 4 - Kahua bible

ROMANI NA KIHA 4

¹Barokomu, go bâkoro taraha. Na tohomu. Na maamu karu mangarerua na kuvê garu hetakui heri, ma karu bâbâ hura igê na gahu maraherahe i kuku i maamu. Na varehumu ki kavokavo manga na togoha ni goti ga tari rekereke bê rere igê na hungani i Giliata.

²Na rivomu ka siki ahuru mangara na sipi, ga kahu tapurura ma ka manuhira. Ngaigi hato ki tonga. Mareha tani vige asiba râ.

³Na gaviharamu ka na gagana na gahu memera. Na haramu ki rongo koro era. Na parimu karu merameraga hura me igê na gahu maraherahe mangarerua na guani na gahiga.

⁴Na riomu ki maratorana na bebetehe iana o Tavite, i manaporoporo ma ki mamao. Na garo bara iamu ki manga na rehagaro na bêata, na bêata na mane ni me ramo.

⁵Na susumu karu mangarerua na kare papa na goti vasiga garu ngêngê i berarogani na mahe bâkoro.

⁶Igê manurahitagana i magaroha matena i taketake arârâ na arito inê be râ igê na hungana i manasia na tavona na gatoga na hungana igê na marâ i sigini koro.

⁷Barokomu. Go bâkoro taraha. Na tohomu.

⁸Râ me êraku koro. Rere me heniê tenigi na botoni i Libanone tenigi na hungani tenia na barana i Amana tenia na barana i Seniri tenia na barana i Heremone. Tenigi na hungani ga ogasigi na laione ma na marâ vasiga vigana.

⁹Barakomu ma êraku koro, go oga i mangataku, matena gê bâsigi moramora na bâhanani na maamu ma na mahe i riomu.

¹⁰Barokomu ma êraku koro na hetakuiha iamu ki angariê. Ngaia ki mamaki teharia na vaini. Na vanuhamu ki sigini koro teharigi na vanuha hato getigi.

¹¹Na gaviharamu, êraku koro, ka na pirui tangê. I ruguhana na meamu karu oga igê na pirui ma na tavona na susu. Na gahu iamu ka unuha manga i Libanone.

¹²Barokomu, na êraku koro, igo ka na mu ga ravoravoa, na mu ni mahe ga pararihia. Igo ka na ve banga ga baratokoa.

¹³Igo ka na agua bâkoro ngavê ni apinige ni ngauha ga rasirasi bâkoro. Na rauga ma na mahe ga sigini koro ka manasia.

¹⁴Na ataka mavê na vanuhani koro na varo ma na rauga ma na tavoni na apinige ka unuha ngavê i na agua ngekana.

¹⁵Igo ka na ve banga i mu, na ve pusupusu na ve ni mêriha, na ve i ogogo so tenia i Libanone.

¹⁶Aharaga, roga tenia i asi! Aharaga, roga tenia i bemu! Muru rogasia na mu iaku, hanana na vanuhana koro ke unuha i na ara ni agua. Vikana barokona iaku ke râ me i mu iaku ke ngêgi na guani koro na apinige.