Read Kahua ROMANI NA KIHA 5 Bible Online

ROMANI NA KIHA 5 - Kahua bible

ROMANI NA KIHA 5

¹Barokomu, na êraku koro, inê kê bani oga noga i mu iaku. Inê kê tataku na marâ i sigini koro. Inê kê ngêgi na pirui henigi na robota. Inê kê tonomigi na vaini ma na tavoni na susu. Ngêngê, bamane, ma kamu totono, totono na hetakuiha mataro me ki ruguhigamu.

²Inê kê mêru ma na aitangihaku ki pe tora bono. Inê kê marute, vi baharana iaku ki korekore i maani ruma, ki vi: ‘Barokomu, baharamu, na kuvê iaku gê takuia, gu tangahia taraku. Na bêku ki voka renigi na kârupu ma na varehuku renigi na vaha igê na bungiani.’

³Inê kê bani tasigi râ na gahu iaku. Tanu hega, kani vigê hagesuru aporo nikâ? Inê kê bani tananigi na êgaku. Tanu hega kani vigê hagamakoragi nikâ?

⁴Baharana iaku ki têa na maani ruma. Na bunaniaku ki hepehepe, suria ngaia ki ura me hagarangi.

⁵Inê kê aharaga, hanana gê taha tarana, ki banu me baharana iaku. Na rimaku ki ruhu renigi na tavoni na gatoga, ga ususu i kakêku, matena gê têa na raburina na maani ruma.

⁶Inê kê taha tarana baharana iaku ma ngaia ki bani râ. Inê kê obania bâraha vi ve rongoa na ringena ma ngaia ki bani magahuru. Inê kê bâbâ renia ma kê pe tarahua. Inê kê unia, ma ngaia ki pe arami rârâ.

⁷Na mane ga arârâ pusia na hinua ka tarahuê ma ka tahuruê. Ngaira ka hagamamariê. Na mane ga bâsuria na para ni hinua ka tarisia râ na aruhaku.

⁸Kere gete ni Jerusaleme mu suru tangê, vi manga mu tarahua baharana iaku, ma kamu hagarongoa, vi inê kê haga ni bagamame, suria gê angisia ngavê.

⁹Igo na tohona. I hega, maharamu i tora getea vari tenira na ani getera? Tanu hega kani vora re baharana iamu manimani, hanana go katogami, kami surusuru vikana?

¹⁰Baharana iaku ki bâkoro ngavê ma ki raramohaga. Ngaia ki teharira na bera na mane.

¹¹Na maana ki na golo, na golo taranina. Na varehuna ka na ahani na ni ga ababarere ma ka masuri manga na maaraha.

¹²Na maana karu bâkoro ngavê mangarerua na kuvê igê na ve i gogogo. Ngairerua karu mamanu igê na tavona na susu.

¹³Na parina karu unuha koro manga na mu ni mahe. Na gaviharana karu mangagi na mahe memera ma karu voka renigi na tavoni na gatoga.

¹⁴Na rimana karu manga na golo i manaporoporo ma karu togatoga mangagi na hê i raha na meni. Na apena ki mamao manga rivo siki ma ki togatoga renigi na hê maravarava.

¹⁵Na êgana karu manaporoporo manga na hê bâkoro. Na golo ki têgi na hunaterua. Ngaia ki bagararaha manga na hungana i Libanone mangagi na apinige ga rapu oto.

¹⁶Na harana ki mamaki ngavê. Na ara ni marâ renia ka hagamuê. Kere gete ni Jerusaleme, nga hanana baharana iaku ngekana. Ngaia nga kani barokona iaku.