Read Kahua ROMANI NA KIHA 6 Bible Online

ROMANI NA KIHA 6 - Kahua bible

ROMANI NA KIHA 6

¹Igo na tohona, maharamu iamu ki râ i he? Visia me, i he kani râ igê maharamu iamu, hanana mi tamanigo ka garia.

²Baharana iaku, ki râ i mu iana, ga akê igê na apinige ga sigini koro, hanana i hagangêra na togoha iana ma ki tataku na mahe bâkoro.

³Baharana iaku kani iaku ma inê kani iana. Ngaia ki hagangêra na togoha iana i berarogani na mahe bâkoro.

⁴Baharana iaku go bâkoro ngavê manga na hinua i Tirisa, manga na hinua i Jerusaleme. Go hagagasuga mangagi na higu i bara i vavearo.

⁵Manga go boreteniê, na maamu karu hagarugu obaku. Na varehumu ki kavokavo manga na totoha ni goti ga tari rekereke bê rere igê na hungani i Gileata.

⁶Na rivomu ka siki ahuru mangara na togoha ni sipi, ga kahu manuhira. Ngaigi hato ki tonga, mareha tani vige asiba râ.

⁷Na parimu karu merameraga hura igê na gahu maraherahe.

⁸Henaka na maneraha ki nahunira kaniana tangahuru ge ono ma na gete râ ma iana tangahuru ge varu ma na bera na kere gete.

⁹Ma inê, inê kê takuia na ani gi tage togo ma. I mareha rârâ tani, vige maratorana na kuvê iaku gê takuia ngavê. Ngaia nga na ani i tâ i mangatana kenana. Ma i maana kenana ngaia ki bâkoro ngavê teharira na ani mavê getera. Na kere gete hato ga bâsia ka visia vi babarisi. Na gete iana na maneraha ma na gete râ ma iana ka hagarahasia ngavê.

¹⁰Matena i rêra me, ngaia i manga na arito i raboa. Ngaia ki bâkoro ngavê manga na hageha ma ki mave manga na arito i ramo ma ki hagagasuga mangagi na higu i bara i vavearo.

¹¹Inê kê rere so tanga na mu iaku igê na maruguna, hanana vigê bâsigi manga vi na angari ka hisihisi ma na vaini ka papêhu ma na gahiga ka takataka.

¹²Inê kê gahasigo manga na mane ni me igê na kati iana i gahasia na hearihatana.

¹³Kere gete ni Suleme, gu mâ, gu mâ, kami bâsigo go mâmâ. I hega, kani mu obania vigamu bâsiê gê mâmâ i guputa na enoni ga borebore.