Read Kahua ROMANI NA KIHA 7 Bible Online

ROMANI NA KIHA 7 - Kahua bible

ROMANI NA KIHA 7

¹Baharamu iaku. Na tohomu! Na ababani ugamu igê na santere karu bâkoro ngavê. Na tangamu karu arige manga na garo bara i tagarahia na mane i manisingenia.

²Na pomu ki arigokogoko manga na apira i vunuvunu tare renia na vaini. Na obamu ki manga na koni ga rurura i gupuni na garoro taku bâkoro.

³Na susumu karu mangarerua na kare papa na goti vasiga.

⁴Na riomu ki maratorana na rivona na pusuasi. Na maamu karu maratorani na nonganonga i Geseboni, ga hagarangia na maani para ni hinua. Na barisumu ki riki hura manga na bebetehe i Libanone i anumasia i Tamasiko.

⁵Na bêmu ki akê manga na hungana i Karamele. Na hirihiriana ni varehumu ki togatoga manga i rotorotoaga memera. Na bâkorohana na varehumu ki hagarigu parongana na maneraha.

⁶Go bâkoro taraha! Na tohomu! Na vagevageha ki teha ngavê renia na hetakuiha iamu.

⁷Na bâkorohamu ki manga na ni. Na susumu ka na gena na ni.

⁸Inê be hane na ni ngekana ma be husi na guani. Tangê inê, na susumu ka na parani na vaini. Na manavasua iamu ka na unuhani na gahiga.

⁹Na haramu ki mamaki manga na vaini mora. Na vaini ke gogo ototo râ tanga na baharana iaku ma ke monamonaga i gaviharana me rivona!

¹⁰Inê kani iana baharana iaku ma ngaia ke vanasiê.

¹¹Barokomu, garu hura karu râ i bemu ma karu tâ i berarogani na mahe.

¹²Igê na mahogotana karu riterite, hanana garu haharirigi na vaini manga vi ngaigi ki papêhu manga i he kaniga ahaketa na takani ma ki manga i he kaniga ka takataka na gahiga. I ngekana inê be megomêru igê. I ngekana ki na ruma iakerua.

¹³Na ria ki unuha i ngekana ma na apinige hato ga mamaki na guani ka akê i ngekana. Na girarani hato na hetakuiha ngegana, na bani ani ma na ani haoru, inê kê bani nakagi tangago, barokomu iaku.