Read Kahua ROMANI NA KIHA 8 Bible Online

ROMANI NA KIHA 8 - Kahua bible

ROMANI NA KIHA 8

¹Manga vigu vora vigo ka na veogaku, manga vi kenaku ke hagasusugo, vikê, manga vi ve tarahugo i tara, inê be girara ve siginigo ma na enoni ka atani bâbâ mavê.

²Vikê inê be urugo i pasina kenaku ma ku hagesuriê i ngekana renia na hetakuiha. Inê be vatego ku tono na vaini mora na vaini na tavoni na gahiga.

³Na rimamu na mahamu ki tâ i siruguhana na bêku ma na otomu ki ruiê.

⁴Kere gete ni Jerusaleme, be vi tangagamu, siana kamu hagaritea na hetakuiha heri mataro me ki obania ngaia marena.

⁵Ka ti kani arâ me akana tenia na masusu here rima henia i na harana? Inê kê hagaritego i ruguhana na gahiga, na agua kenamu ki atuingenigo ma ki aparago igê.

⁶Na hetakuiha tangê ma inê ke tâ i aitangihamu. Gu ruiê ma inê. Na hetakuiha ki ramo ngavê manga na mera. Na hetakuiha i asa vigu tahi tenia. Na hetakuiha ki manga na gi manga na gi iana na Araha i asa vige page me.

⁷Na ve ki asa vige sirihi hunuia, naka ma na ve i maganu. Manga na enoni ma ki takusia vi vuria na hetakuiha, henaka renigi na nahuninga hato iana, na enoni ka kikitenia hete.

⁸O veogaku ka vi: “Igia ka tonga re kesika. Na susuna karu bubu mênga. Na ta ka page katoa, manga vi ta na vahunani me ki nungia vi auragia?

⁹Manga kesika ki na para ni hinua igia ka page tagarahigi igê na bebetehe ni siliva. Manga vi ngaia ki na maani para, igia ka page purusia renigi na raburini na bagora.”

¹⁰Ma na para ni hinua kani inê. Na susuku ka na bebetehe. Ma na baharana iaku ki girara, vi, matena gê gâga henia, inê ki togotogo na aitangihaku ma kê vagevagesia na marapeha.

¹¹O Solomone ki nahunia na mu ni vaini igê na agua ga hêtana vi Bala Hamone. Na enoni tagara ka taharia tenia. Na ara ni hitangita ki tavogi na rehagaro na maani na siliva.

¹²Igo Solomone, gu vagevagesigi ma na rehagaro na haga iamu, ma igamu na enoni tagara mu vagevagesigi na tangarê gi rua na haga iami. Ma inê kê nahunia nogaku na mu ni vaini, na aniku mareku ma inê nga kanigê bâsuria.

¹³Baharamu iaku, tamasi me tangê tenia na mu, suria na tamaku ka naasigo, vigu tamasi.

¹⁴Gu râ me barokomu iaku, garigari me manga na goti vasiga manga na bêhâgana igê na hungani ga akê igê marâ i sigini koro.