Read Kahua AITANGISIHA 1 Bible Online

AITANGISIHA 1 - Kahua bible

AITANGISIHA 1

¹Igamu mu nahuni ramoha i maveta, mu barigia na otoha. Mu takusia maninga tare na Araha. Mu garigari takoha i pasina, hanana mu têtê viteana.

²Na ani ga pe uhungia na Araha, ngaira ka page tarahua. Ngaia ki hagabângenia marena tangara na ani ga hagêguritogo renia.

³Na takoha ni hagabekaniha ka voasira na enoni tenia God. Manga igia ma ka beka ka uhungia, na raramohana ki hagamakigia.

⁴Na aitangisiha ki asa vige oga i pasina na enoni i tenigi na eraha ma na tasi ki angaria.

⁵Na higona apu ni hagesuringa koro ki kitenira na enoni ni hagahagaparunga, ki usitenigi na tamasinga bekabekaga ma ki huhura tenira na ani ga hagamamasiagara na enoni.

⁶Na higona ni aitangisiha ki takuira na enoni ma ki hagaitangia na enoni i tamasi erasia God, suria God ki giraragi na aitangihaka ma na takoha iaka ma ki rongogi na ara ni tamasinga hato iaka.

⁷Suria na higona iana na Araha ki raro i maveta hagenani ma ki taugi haku na ara ni marâ hato igê, tahema, ngaia ki aitangisigi na ara ni tamasinga iata na enoni.

⁸Na enoni i tamasigi na tamasinga era, ki asa iana vige oga pinihi. Na hagaitangiha i araria ki page tarahua nga.

⁹Na Araha ki haharirigi maninga na takoha iata na enoni ga pe botage renia. Na Araha ki rongogi na ringeni na tamasinga iata, ma ki page hagaitangira meni na bagatauhata.

¹⁰God ki kitenira na ani ga meheparapara ma suria ngaia ki rongogi na ara ni marâ, ngaia ki giraragi na tamasinga ngurunguru ma na hagagegeha.

¹¹Vikê, siana kamu hagagege rârâ, suria i asa vige tamanigamu. Siana kamu tamasigi na hagatorainga. Na ara ni tamasinga pinihi iami ka hagaratemi. Na enoni ni hagaparunga ki hagamesia so na atarona marena.

¹²Siana kamu hagaratena na mera renigi na bagaparongami se renigi na bagatauhami.

¹³God ki pe hagavorea na mera ma ki pe vagevage, matena ga meme na ani i hagavorara.

¹⁴Ngaia ki hagavorara na ara ni marâ hato, hanana viga gâga hagahu. Na ara ni marâ i hagavorara ka komaga ma ka korokoro. I mareha rârâ ta na marâ i pasita vige hagamesira. Mareha, na mera ki pe marungia na maveta ikê,

¹⁵suria na otoha iana God ki asa vige page me.

¹⁶Na enoni ga pe botage renia God ka hagarateta mareta renia na mera meni na tamasinga iata ma na bagatauhata. Na mera ki bara i na aitangihata manga vi ngaia ki na rokota. Ngaira ma na mera ka suruheri nga. Na tarana i ararira ngekana!