Read Kahua AITANGISIHA 10 Bible Online

AITANGISIHA 10 - Kahua bible

AITANGISIHA 10

¹Matena na mane o vaemana na maveta God ki hagavora ki oga getegetea mênga, na takoha mataha ki anumasia ma ki hagatahia tenia na bagatauhana.

²Ngaia ki vatea renia na ramoha, hanana i marungia na maveta henira na ara ni marâ hato igê.

³Ma ta na mane erataga ki rumakaka renia na takoha mataha. Ngaia ki nahu hunia o vesina, matena i gasuga ni mangariaga bâraha tanga. Ngaia ki hagaratena marena.

⁴Suria vikana na maganuha raha ki anuia na maveta ma na takoha mataha ki hagatahia nikâ, suria igê na maganuha ngaia ki bêngenia na mane koro i oga igê na haka na paparagê.

⁵Nikâ, matena na enoni i maveta ka hegêni igê na eraha ma ka tugupu renia, na takoha mataha ki tarahua na mane koro ma ki anumasia, hanana i korokoro tare i maana God. Ngaia ki hagaramonia, ki râ suria na bonasiha iana God tanga, henaka i takuia ngavê o karena.

⁶Nikâ, matena na enoni ga pe botage renia God ka hemeri, na takoha mataha ki hagatahia na mane i koro, matena i gava pania na gi i hagamakakagi na hinua gi rima.

⁷Na peregana na eraha ngekana ki gâga mênga. Na mako i ngekana ki matarotaroga ma ki vavangaga. Na rauga ka takataka nunu. Na u na vakivaki marasiga na gete i guguruga, ngaia ki gâga mênga.

⁸Na enoni i hinua ngegana ka pe botage renia na takoha mataha. Tahema ngaira ka pe girara vi na ta ki koro ma na ta ki era. Na rahugani na hinua iata ka hagatakusigia mênga renigi na bekabekaganiha iata, hanana na bagatauhata ki na hagesuringa tangagia igia hato.

⁹Ma na takoha mataha ki hagatahira na kariana tenia na perenga.

¹⁰Nikâ, matena ta na mane koro ki gavatenia na mangariaganiha iana o veogana, na takoha mataha ki bêngenia suria na otona na tara. Ngaia ki hagagirara renia na arahanga iana God ma renigi na marâ igê na apanena iana God. Ngaia ki haganahunia renia na ramana ma ki katoa ki tavoraha bâkoro igê na tagaraha raha iana.

¹¹Matena na enoni getera ka hengaria ma ka rapasia viga raugi na nahuninga iana tenia, na takoha mataha ki ngahisia ma ki katoa ki ruruguha.

¹²Ngaia ki anumasia tenira na merongana ma na ani ga gamorahia. Ngaia ki katoa ki teha igê na hearihatana i higa, hanana i tahetara, vi na tê viteana God ki ramo teharigi na ani mavê na marâ.

¹³Nikâ, matena ga hagavuringenia na mane koro ki vora re na kare rakuraku na takoha mataha ki pe sika pania, ma ki hagatahia hete tenia na tasi. Ngaia ki oga henia i ruma ni hagaitangiha,

¹⁴ma ki ngahisia rârâ tariha me matena i maneraha ma ki marungira na enoni ga hagamamasiaga i nago. Na takoha mataha ki ranganira na enoni ga hagatoraia, vi ngaira ka hagaparu, ma ki kasia akê hete na mane koro ki rongo raha hagahu na atana.

¹⁵Nikâ, na takoha mataha ki hagatahira na enoni ga koro ma ka matarotaro i maana God tenira na ani ga hagamamasiagara.

¹⁶Ngaia ki angaria na atarona na hitangita na kariana God ma ki hagabarasira na maneraha ni haganunuha, suria i katogi na mena ma na tagaraha raha.

¹⁷Na takoha mataha ki vurira na kariana God renigi na mena na tagaraha raha iata. Ngaia ki bêngenira igê na râha i menaga. Ngaia ki mamarusira surigi na tangiani, ma ki mavesira surigi na bungiani manga na higu ni bêngeniha.

¹⁸Ngaia ki bêngenira ka tarêhia na Asi Memera i rutuni

¹⁹ma ki anuira na merongata ka tono ka me ma ki matarongenigi na gahuata i one.

²⁰Vikana na enoni ga koro i maana God ka rurugu tenira na ani ga pe botage renia God. Ngaira ka ki ka visia raha na atamu apuna, Araha, ma ka hagarahasigo, suria go rohe pusira.

²¹Na takoha mataha ki katora ka tamasi na ani ga pegirara ge tamasi ma ki katogi na ringeta ka rongo mataha.