Read Kahua AITANGISIHA 11 Bible Online

AITANGISIHA 11 - Kahua bible

AITANGISIHA 11

¹Na takoha mataha ki katora na Isiraelita ka akê me bâkoro renia na poropete iana God.

²Ngaira ka aharêvoro igê na bagamasusu raha i hihiruga ma ka tênga surigi na agua i mareha rârâ vige bani oga me igê na enoni.

³Ngaira ka ura gatagata pusira na merongata ma ka sugarira bê aporo.

⁴Matena na kariamu ki mamata na riota, ngaira ka avarasigo Araha, ma igo ko hagatunomira renia na ve i gogo me tenia na hêmeo.

⁵Na bagabevoani ga hagaitangira na ai ni Esipito ka hagatahira na kariamu tenigi na mamasiaganiha iata.

⁶Suria na merongata ngegana ka haribona vige nahuira ka meme na kareta na kariamu, igo ko katoa na ve oto ki amera renia na gapu mapuaga. Igê na bagamasusu raha igo ko naka ki mamata na riota na kariamu, hanana go hagagirarara, vi manga i he ko hagaitangira na merongata. Hemuri igo ko vatera renigi rako na ve, matena ngaira ka pe rarunia.

⁹Matena go uhungira ma ko hagaotora igê na hetakiha iamu, ngaira ka tahetara renia na mamasiaganiha, i tarahura na enoni erataga, matena go surira igê na mangariaganiha iamu.

¹⁰Igo ko uhungira na kariamu manga o vaema ni kare i uhungira ma ki hagaotora. Ma igo ko surira na merongata ma ko hagaitangira manga na maneraha i asa vige hetaki.

¹¹Henaka ngaira ka hagatê se hagarangi ma ngaira ka mamasiaga.

¹²Na mamasiaganiha iata ki akê me raha ngavê ma ngaira ka gegege ngavê, matena ga takusia aporo na tarana i bani akê me i nago.

¹³Matena ga girara, vi na hagaitangiha tangara ki tamanira na kariamu, ngaira ka tahetara, vi ngaia ka na tagaraha iamu, Araha.

¹⁴I nago na ai ni Esipito ka usitenia ma ka memarabe na mane ga kasia i ve, matena i merameraga mênga, ki rârâ ma ngaira ka konetenia. Ngaira ki mamata na riota ma ki tora hegitigi tenia na anita na enoni ga tê viteana God.

¹⁵Suria ngaira ka erataga, tahema ngaira ka tako bekabekaga. Vikê ngaira ka hagarapera na ma ma na ani getera na marâ bera ga angoango ma ka pe nahuni ramoha ni takoha. Tahema igo ko hagaitangira renigi na bera na marâ vigana.

¹⁶Igê na tarana ngekana igo ko hagesurira, vi na marâ i hagatasira na enoni ki hagaitangira nogata nikâ meni na tasi iata.

¹⁷Araha, suria go raramohaga hunigo, igo ko hagavora na maveta renia na marâ i pe tonga nununa. I arari ma vigu hagaitangira na enoni ngegana renira rako na o vasiga se na laione garagara ga ngasira.

¹⁸I arari ma vigu hagavorara na ani haoru na marâ vasiga, ga mangaringari ngavê, ka manavasotenia na gi, se ga ngurunguru, se ga hengohengo mapuaga se ga bâbâ mamagutaga, suria ga ririki na maata.

¹⁹I arari ma vigu hagavorara na marâ vigana, mareha vige taharira na enoni ngegana ke nahuira ke meme, ma ke hagabubununugara, ka meme renia ga bâ mamagutaga ngavê.

²⁰Henaka, ma igo ki mareha. I arari ma vigu hagamesira renia na kere uhinga gi tage na otoha i tarigenira, se vi renia na uhinga na raramohamu i hitarira so. Ma igo ki mareha, suria igo ko hagagaragi na arâ ni marâ igê na hagevovoani, igê vi gi hita ma igê na higahigani.

²¹Araha, igo ko girara go hagabângenia na raramohamu raha igê na ani mavê na matena go obania, ma ki mareha ta na enoni ge girara vige rêrâ pusia.

²²Tangago igo, na maveta hagenani ki manga ma na kere momo, i pe higea vato na marâ ga hagararigi igê na higahigani, se i manga na êsusu na kârupu i ano igê na mavoraro.

²³Henaka, vi suria go raramohaga hunigo, ma igo ko takira hete na enoni hato. Igo ko pe takusigi na tasi iata, suria go obanira viga urisi parongata.

²⁴Igo ko takuira na ara ni marâ ga oga. Igo ko pe ruhira na marâ go hagavorara. Manga gu ruhia ta na marâ, vikê igo ki asa vigu hagavora.

²⁵Manga i he ta na marâ ki girara vi gâga tare, manga vi igo ma ko pe obania? Manga i he ta na marâ ki girara vi gâga tare, manga vi igo ma ko pe hagavora?

²⁶Igo ko nakara na marâ hato ka oga, suria ka na animu, Araha, ma ko takuira na ara ni marâ ga mauri.