Read Kahua AITANGISIHA 13 Bible Online

AITANGISIHA 13 - Kahua bible

AITANGISIHA 13

¹Na enoni ga pe hagarea God ngaira ka beka ngavê. Henaka ga bâsigi na marâ koro rihira, na enoni ngegana ki asa vige tahetara vi God ki gâga. Henaka ngaira ka hagesuringenigi na marâ God i hagavoregi, ngaira ka pe tahetara vi na ani i hagavoragi ki goga.

²Ngaira ka takusia ma, vi na gi, se vi na roga, se vi na roga raha, se vi na higu, se vi na ve oto, se vi na marâ ga mave i vavearo ka na ataro ga marungia na maveta.

³Suria na enoni ka gahe surigi na bâkorohani na marâ ngegana, tahema ngaira ka takusia ma, vi ngaira ka na ataro ma ka pe tahetara hete renia na Araha, na Avanuni, i teharigi ngaigi hato haku, suria ngaia ki hagavoragi henigi na bâkorohani.

⁴Suria na enoni ka konetenigi na ramoha ma na tagaraha iani na marâ ngegana, ki ararira hete vige girara vi na ani hagavoragi ki ramo teharigi ngaigi.

⁵Manga vi igia ma ke hagakitakitagi na hahanetagani ma na bâkorohani na marâ God i hagavoragi, igia ke kahu girara vi ngaia nga God kani hagavoragi.

⁶Henaka vikana, ma siana igia ka visira bâraha na enoni ngegana. Vari ngaira ka hagatasia na tara, matena ga uhungia maninga viga garia God, ma ki bara tangara vige tarahua.

⁷Matena ga hahutugigi na tagaraha iana God rihira, na bâkorohani ka hagatasira ma ka katora ka takusigi vi na ataro kani ngaigi.

⁸Henaka, ma ngaira ka tasi.

⁹Ngaira ka girara ga hagesuringenigi na marâ hato ga goga ma ka girara ga hahutugia na maveta. Tanu hega kaniga pe tarahua na Araha iani na marâ hato?

¹⁰Tani na enoni ka nagia ve ngavê, suria ga tako togo renigi na marâ ga pe nahuni mêriha. Ngaira ka rahesigi na marâ ga tahegi bâkoro na enoni, ka taruhigi renigi na golo ma na siliva, ka vi vi ngaigi ka na ataro: na nunuta na puruka ma na marâ vigana, se na hê purua i tahea ta na enoni i kerevê râ.

¹¹Bâsia na mane i manisingenia i tagarahigi na apinige. Ngaia ki tapia so na apinige koro ma ki gaia maninga na gavona. Hemuri ngaia ki tagarahia maninga renia ta na marâ i araria na mêriha.

¹²Na asitarigani ngaigi ka na ario iana i hagamako renigi na ngêra. Hemuri ngaia ki gâga so ki ngêngê masu.

¹³I berarogani vari tagua ki gâga ma ki pe araria ta na marâ, suria i ahiohio se i boroboroga. Ngaia ki torea ma ki tahea haharitagi igê na matena i pe aruma igê. Matena i nahunia na matora, ngaia ki tahea ki nununia igê na enoni,

¹⁴se igê ta na marâ purua mamauri. Ngaia ki taruhia renia na puara memera, hanana ga magahuru na agua ga bera.

¹⁵Hemuri ngaia ki tagarahia na kere ruma sisite tanga ki naka igê na apê ma ki rapusia râ igê renigi na nila.

¹⁶Ngaia ki naka maninga, hanana siana ki votavota, suria i girara, vi na marâ ngekana ki pe girara ge tamania so marena. Tahema ngaia ki tamania, suria ngaia ka na nununa ma.

¹⁷Henaka, ma ngaia ki pe maki vige avarasia na marâ i pe nahuni mêriha ngekana tanga na êragiha iana tangara na karena ma tangagi na nahuninga iana.

¹⁸Ngaia ki avarasia na marâ i pe nahuni ramoha ngekana tanga na apekoroha. Ngaia ki avarasia na marâ i me ngekana renia na mêriha. Ngaia ki avarasia na marâ purua ngavê. Henaka ngaia ki na marâ i asa vige arârâ, ma ngaia ki avarasia vi akê me maninga na râha iana.

¹⁹Na marâ i pe nahuni ramoha rârâ rimana, ma ngaia ki avarasia, hanana ga tavoraha bâkoro na tagaraha ni haga iana, na nahuninga iana ma na tagaraha iana.