Read Kahua AITANGISIHA 14 Bible Online

AITANGISIHA 14 - Kahua bible

AITANGISIHA 14

¹I tagenana ma tanga na enoni i nanê vi arâ igê na haka igê na asi era. Ngaia ki avarasia ta bogona na apinige, i pe gatagata manga na haka i sugi arâ igê.

²Ta na enoni ki takusia na haka, suria i tangasia na hagavarahagi haga, ma na mane i manisingenia na tagaraha ni haka ngaia ki tagarahia.

³Ma ti ki hagaotoa na haka? Igo nga God vaemamami kanigo girara, ma ko anumasia. Igo nga kanigo bêngenia bâkoro na haka igê na asi era. Na enoni ka girara ga arâ igê na haka,

⁴henaka ga pe manisingenia rârâ, suria igo ko girara go hagatahira tenia na ani mavê na perenga.

⁵Igo ko pe obania, vi na marâ i tagarahigi na takoha mataha iamu vige gâga purua ma. Tahema na enoni ka girara ga hagêguria na bahitana na apinige. Ngaira ka arâ i asi ma ka atata râ bâkoro ma.

⁶Nga hanana i nago kerevê noga ngekana igê na matena ga meme igê na enoni paroparo, ga borahu ma ka ramo. Na manavana na maveta ki ruku igê na haka ma ki tahi, suria go hagaotoa, ma ki vora re na hunana na apaparaha haoru ninuni i maveta ki bê ki arâ.

⁷God ki koro tanga na apinige na haka iana o Noa, suria i hagatahira na enoni ga koro i maana

⁸ma ki kitenia ngavê na nununa na ataro na marâ ga tagarahia na enoni. Ngaia ki kitenia nikâ na ani i tagarahia, suria i tagarahia na marâ i girara i magahuru râ ma ki vi, vi na ataro.

⁹God ki kitenira tagenata na enoni ga erataga henigi na eraha iata.

¹⁰Ngaia ki hagaitangira tagenata na marâ ga tagarahigi na enoni ma ngaira ka tagarahigi.

¹¹Vikana God ki page hagaitangigi na nununi na ataro iata na enoni ahuroto. Henaka ngaira ka tagarahigi renigi na marâ God i hagavoragi. Ngaigi ki vora re na marâ God i kitinigi ngavê ma ka uhungigi na atarota na enoni ma ka hagatasira na enoni ga tako bekabekaga.

¹²Igê nga na matena na enoni ka haganega ka tagarahigi igê na nunuta na ataro, ngaira ka haganega ka paronga iera. Na tagarahiana ni nununi ataro ngaia nga ka na hunana na hagaerasiana na ogaha iata na enoni.

¹³Ngaigi ki pe bani oga me i kerevê noga ma ki asa vige oga tare.

¹⁴Na paroparoha iata na enoni kaniga hagavoregi. Tahema na hatongita ki pe arihu.

¹⁵Ta na mane ma ki angisia bâraha na karena i meme buna. Vikê ngaia ki tahetahe nununa na karena i pe bani hinarua vige meme tenia. Ngaia ki hagahigasia na enoni i me, ki katoa manga vi ngaia ka na ataro. Ngaia ki hagatarêngenigi na tarani ni vogasiha ma ni hagarahenga tangara na enoni i ruguhana.

¹⁶Ki arârâ ma na tauhana erataga ngekana ki akê me ki gatagata ngavê ma ki tongatonga re ramata. Vikê na enoni ga nahuni ramoha ka bonasira na enoni getera ka vogasigi na nununi ga visigi vi na ataro.

¹⁷Matena na enoni ka obania bâraha viga hagahigasia na maneraha iata, ma ki bara tangara suria ga oga hagatê tenia, ngaira ka takusia râ ma vi manga i he ki bâ, ma ka tagarahia na nununa ki bâbâ manga ngaia. Vikana ngaira ka girara ga hagahigasia na maneraha iata i pe oga nga i pasita, manga vi ngaia ki oga i pasita.

¹⁸Na enoni ga tagarahigi na nununa na maneraha ka metogeaga na vogasiha ni maneraha i berarogata na enoni, henaka na enoni ka pe hagarea na maneraha.

¹⁹Na enoni ga manisingenia na tahenga ka tagarahigi bâkoro ngavê na nununa na maneraha teharia manga hanana i bâ na maneraha, suria ga obania viga hagakoro obana na maneraha.

²⁰Hemuri na enoni ga hagahigasia i nago na maneraha, ka kahu rahesia, suria na bâkorohana na nununa ki hagamura.

²¹Na ogaha iata na enoni ka tu igê na tarana ngekana. Na enoni ga mamasiaga renigi na bagabevoani, se renia na maneraha ki hagamamasiagara, ngaira ka toregi na hê se na bogoni na apinige ma ka vivi, vi God kani ngaigi.

²²Na tarana gi tage i hagarate. Na aitangisiha iata renia God ki râ tasi. Ma nikâ ngaira ka oga igê na hearihatana ni eraha. Ma suria ngaira ka pe hagarea, ngaira ka vi ma, vi na hearihatana ni eraha ka na marapeha.

²³Igê na hagarahenga ngaira ka nahuira ka meme na kere kare. Ngaira ka pinihigi na hagarahenga iata tenira na enoni getera. Igê na hagarahenga iata ngaira ka totono papasi ma ka atani paronga era mavê.

²⁴Na eraha ki aharêsia na ogaha iata. Ngaira ki asa vige hagahigasia rârâ na êragiha iata. Ta na mane ki hagabekasia ta na mane ki nahuia ki meme se ki hagaera obana suria i memêru kaniana.

²⁵I mareha rârâ ta na marâ, nga noga ma na nahunga ninuni, ka hanago, ka hagahagaparu, ka vatevate, ka pe toto hesuri, ka katogi na perenga, ka tohe vero,

²⁶ka hagamamasiagara na enoni koro, ka pe visira koro na enoni ga koro tangara, ka aharêngigi na ramata hato, na mane ka paronga era henira na mane, ma na gete henira na gete, ka hekasigi, ka gamogamo, ma ka katogi na ani mavê na tarani ga era.

²⁷Na vogasiha ni ataro, henaka ga pe gâga ngaia ki na haganegahani, na hatongini, na hunani ma na guani na ara ni eraha hato.

²⁸Na enoni ga rahesira na ataro ka vagevage bekabekaga ngavê se ka tamasi poropete ma ka hagaparu ma, se i erataga na ogaha iata, se ga atani tohetohe vero râ nga.

²⁹Suria ga hagarapera na nunuta na ataro, ga pe nahuni mêriha, tahema ngaira ka pe rarunia na hagaitangiha meni na tohenga vero iata.

³⁰Henaka, ma i ta na matena na hagaitangiha ki page tarahura surirerua na tarani gi rua. Na ani gi tage: na takoha iata renia God ki râ tasi, suria ngaira ka hagarapera na ataro. Ma na ruata: ngaira ka hagahagabeka ma ka tohetohe vero, suria ga pe hagahigasigi rârâ na marâ ga apuna.

³¹Mareha vi na ramoha iana na marâ ga tohe renia ma na hagaitangiha hete i ararira na enoni tasi kani page tarahura na enoni erataga.