Read Kahua AITANGISIHA 15 Bible Online

AITANGISIHA 15 - Kahua bible

AITANGISIHA 15

¹Igo God iamami, igo ko koro, ko pe hagaparu, ko haritagi ma ko marungira na ara ni marâ hato igê na hetakiha.

²Henaka vigami tasitasi, igami ka na animu, suria igami kami pe hagaiga na raramohamu. Igami kami pe obania vigami tasitasi, suria igami ka na animu.

³Na aitangisiha renigo ka na ogaha koro teha. Na aganariana na raramohamu ka na hunana na mêriha hagahu.

⁴I mareha rârâ ta na takoha hagahagaparu iata na enoni vige hagatasigami, se vi na marâ purua ga supurugi na enoni, se vi na nununa totoperega na ataro.

⁵Manga na enoni i tako bekabekaga ma ki bâsigi, na teniha ga angaria ma ngaia ki tangasia na nununa i pe nahunia na atarona se na mêriha.

⁶Na enoni i tagarahia na marâ ngekana, se i angisia, se i rahesia, ngaia ki takuia na eraha ma ki tarahua na marâ i araria.

⁷Takusia na mane i manisingenia i tagarahigi na marâ renia na mako. Ngaia ki tagara raha ki pigania na mako ki marumu. Ngaia ki hagatotogi na marâ igia ga obanigi renia. Renia na mako nga ngekana ngaia ki hagatotogi re na marâ ni hagamako ngêra igê, se na apira ma na kâkâ ma nikâ na marâ tangagi na tarani getigi. Na tagaraha iana ni hagatotoha ki tagenana tarema. Ma ngaia marena ki hagakitakitagi vi na anita na marâ kani araria na anita na tarana.

⁸Ngaia ki na enoni ma. Ngaia ki vora me tenia na mako i pe arihu râ, ki page arihu ma ngaia ki aporo igê na mako, matena God ki unia aporo na rogaroga ni mêriha i vatea renia. Ngaia ka na enoni ma. Ngaia ki tagara raha ki hagatotoa na ataro i asa vige katoa ta na marâ, renia nga na mako, i hagatotogi re na apira ma na marâ vigana.

⁹Ngaia ki pe tako renia vi na mêrihana ki abubu ma ki sugia ma vige meme. Mareha! Ma na marâ ma i tako bâraha renia, ngaia ki hehanehane henira na ani ga hagatotogi na marâ renigi na golo, na siliva ma na kapa. Ngaia ki ageagesigi ngavê na marâ i tagarahigi. Ngaigi ka mareha vi na morani, suria ngaia ki tagara hesuri ma renia na mako.

¹⁰Na aitangihana ki manga na rahu ma. Na marâ i rarunia ki vora re na marâ purua teharia na momo se na makomako. Na mêriha iana ki pe teharia na mako,

¹¹suria ngaia ki pe hagarea rârâ God i hagatotoa ma ki uhia na rogaroga ni mêriha na atarona igê na apena.

¹²Ngaia ki takusia ma, vi na mêrihana na enoni ka na marâ ni barebareana ma, se vi na agua ni hohoronga tanga na hagavarahagi haga. Ngaia ki hagêguria, vi na tagaraha iana nga kani hagavarahagi haga, naka ma i he, henaka na tarani ga era.

¹³Na mane ngekana i tagarahigi na nunuta na ataro ma na apira ma na marâ vigana renia nga na mako ngekana, ngaia ki girara ngavê teharira na enoni getera vi ngaia ki tasi.

¹⁴Na enoni ga tako bekabekaga ngavê teharira na kare gari, ngaira ka na ani ga merongasira ma ka hagamamasiagara na kariamu, Araha.

¹⁵Ngaira ka takusia, vi na nunuta na ataro iata ga rahesira na enoni ahuroto, kani vi na ataro iata nogata, henaka i asa vige bâbâ renigi na maata, se vigo hengohengo i barisuta, se vige rongorongo renigi na karingata, se vige hatamigi renigi na kakêni rimata, se vige arârâ renigi na êgata.

¹⁶Vigana, suria ta na mane i enoni ma ma ki pe nahuni mêrihana marena, kani tagarahigi ma ki hagatotogi. I asa ta na enoni ge girara vige hagatotoa na ataro ke maratorana na enoni.

¹⁷Na ara ni enoni ki page meme i ta na matena, ma na marâ i hagatotoa renigi na rimana erataga ki bani me igê na haganegahana. Ngaia marena ki tagarahigi na marâ i hagarapegi, suria ngaia ki nahuni mêriha, ma na marâ i hagarapegi ka mareha, ma ki mareha hagetage vige bani nahunia me na mêriha.

¹⁸Na enoni ngegana ka hagarapera na marâ mamauri ga bera ngavê ma ka pe nahuni takoha rârâ.

¹⁹Nikâ ngaira ka pe bâkoro, hanana vi na enoni ke obanira mangara na ani getera God i visira viga bâkoro ma ki pe hagaitangira.