Read Kahua AITANGISIHA 16 Bible Online

AITANGISIHA 16 - Kahua bible

AITANGISIHA 16

¹Tahema ki arari, vi na marâ ngegana ka hagamamasiagara na enoni ngegana ma na ruruha raha iata ka garera ma ka purira so ngavê.

²Ma igo Araha, ko pe hagaitangira vikana na kariamu. Igo ko korokoro hete tangara. Matena ga magê ngavê, igo ko hagangêra renira na manu ga ngê koro era.

³Igo ko kato vikana, hanana na enoni ga hagarapera na ataro ki bara tangara vige ngê, matena ga magê, suria ga bâ makitaga na marâ go kasira tangara. Ma na kariamu ka magê râ ma, ma hemuri ngaira ka ngaua na ngêra mora ngavê.

⁴I tuguhira na merongata na kariamu viga magê ngavê rârâ, hanana na kariamu ka bâsira na ani ga hagamamasiagara ka mamasiaga ngavê hete.

⁵Matena na marâ vasiga mamagutaga ma na ma gara hunu ka taharira na kariamu ma ka hagamesira, igo ko pe mangariaga borahu tangara na kariamu, hanana siana ka meme hato.

⁶Na mamasiaganiha ngekana ki pe oga borahu. Ngaia ka na kanukanuha ma tangara. Hemuri igo ko vatera renia na girarana na tahinga iata, vi na kapa na ma, hanana i hagatakusira renigi na marâ na ramata iamu ga visigi.

⁷Manga na enoni ma ki boretenia na nununa na ma ngekana, ngaia ki tahitahi, mareha vi suria na nununa na ma i bâsia, ma suria hete igo, suria igo ka na tahingata na enoni hato.

⁸Vikana igo ko hagagirarara na merongamami, vi igo nga kanigo hagatahira na enoni tenigi na eraha hato.

⁹Na merongamami ka me, suria na pê ma na rango ru ka garera. Ngaira ka pe tarahua rârâ ta na marâ hanana vige hagatahira, suria na hagaitangiha vikana ki ararira nga.

¹⁰Henaka, ma na rivota na ma gara hunu ki asa vige hagamesira na kariamu, suria igo ko takira, ko tamanira ma ko hagakomagara.

¹¹Na ma ka garera, hanana vi ngaira ka takusigi na ramata iamu, ma ngaira ka hatani tahi, hanana siana ka bonotenigo ngavê ma ka ageagesigi hete na korohamu.

¹²Mareha rârâ vi na apinige, se vi na rauga, se vi na taruhiana renia na ahu kani vige hagakomagara. Ngaira ka komaga aporo renia hete na tamasinga iamu, Araha, na tamasinga iamu i hagakomagara na ara ni marâ hato.

¹³Na mêriha ma na mera karu oga i na ababa ni rimamu. Igo ko nahuni ramoha, hanana go hagamesia na enoni ma ko hagamêria aporo.

¹⁴Na enoni erataga ki girara i hagamesia na enoni ma ki bara tanga vige hagamêria aporo, se vige hagatahia na atarona tenia na agua iata na enoni ga bani me.

¹⁵I asa hagetage ta na enoni vige gava panigo Araha.

¹⁶Na enoni ga pe botage renigo ma ka usitenigo vigu God iata, igo ko hagaitangira renia na raramohamu raha. Na roga henigi na rangi anumaga ma na rangi na êsusu na hê, ka nahuira ma na ania ki suhira.

¹⁷Ma na marâ ni hagakoneha raha, ngaia ki manga ikê. Na gi ki tonga raramohaga ngavê i rarona na ve, na ve na marâ bani hanana i sirihigi na gi, suria na marâ ga oga ka kahu roherohe pusira na enoni ga toto surigo.

¹⁸I tagua na vavatani na gi ka vato, hanana siana ka sungira na marâ mamauri go hagatorangenira ka hagaitangira na enoni ga pe tê viteamu, hanana ngaira ka tahetara vi na suriha iamu ki tarahura.

¹⁹Ma i tagua nikâ i rarona na ve na vavatani na gi ka ramo teha ngavê teharia na anguruna na gi raha teha, hanana i hagamakakagi na mu igê na agua ga ogasia na enoni erataga ngegana.

²⁰Na tarani ngegana ka pe tarahura na kariamu. Igo ko hagangêra hete renia na ngêra iata na angero. Tenia i vavearo igo ko ama ni hagatorangenigi nga na bereti tangara, na bereti ga bani nanê ni ngauha. Na kariamu hato ka marotanigi ngavê, suria i aresurira ngaira hato.

²¹Na mahatanga iamu ngekana ki hagabângenia mave, vi igo ko takuira na karemu ma ko koro tangara, ma ki aririgi na marotaniha iata ngaira hato, suria i râ surigi na marotaniha iata hehegitigi.

²²Na rangi na êsusu na hê ka pe rono i rarona na gi. Na tarana ngekana ki vora ma me, hanana vi ngaira ka tahetara, vi na gi kani hagamakakagi na mu iata na merongata, na gi i ania igê na rangi na êsusu na hê ma igê na tarêheroga.

²³Na gi ngekê ki mepiringiape na ramoha iana, hanana na kariamu koro ka nahuni ngauha.

²⁴Igo ko hagavorara na ara ni marâ hato. Ngaira ka tê viteamu. Ngaira ka hagaitangira na enoni era renigi na raramohata, ma ka haritagi henira na enoni ga tê viteamu, hanana ga korokoro tangara na ani ga hagêguritogo renigo.

²⁵Tahema ngaira ka tora hegitigi igê na tauhata, hanana ga hagabângenia, vi igo ko hagangêra bâkoro na enoni hato surigi na obaniha iata hehegitigi.

²⁶Vikana Araha, na enoni go takuira ka tahetara, vi ngaira ka pe mauri renigi na ngêra i mu iata ma renia hete na tamasinga iamu, i katora ka mauri na ani ga hagêguritogo renigo.

²⁷Na ngêra, na gi ki pe hagamakaka ke magahuru, ki rono arârâ matena na arito ki takiria ki mahana.

²⁸Tahema ki tuguhigami vigami bani riterite, hanana mi visigo koro ma kami nunginungi matena i mave bera râ.

²⁹Na hagêguritogoana iata na enoni ga pe visigo koro ki page magahuru manga na kârupu ma manga na ve i gogogo purua ma.