Read Kahua AITANGISIHA 17 Bible Online

AITANGISIHA 17 - Kahua bible

AITANGISIHA 17

¹Araha, na suriha iamu ka hagakoneha ma ki kere bara vige ramatenigi. Tahema na enoni ga usitenia na hagesuringa renigi, ngaira ka râ tasi.

²Tahema na mengo ki baraira na enoni erataga, ga takusia, vi ngaira ka girara ga hagamamasiagara na kariamu God. I manga vi na bungiana ki rakura i ruma ni hagaitangiha. Ngaira ka tâ i ruma iata mareta, ma ka oga hura tenia na marapeha hagahu iamu.

³Ngaira ka vi ma, vi ga oga pinihi, matena ga bagatauhata pinihi, manga vi na aruha ni pinihiha ki buhira. Ma ke bâ, i ngekê ngaira ka bubununuga ngavê, ka bagatatako ma na maruteha ki hagamagusira ngavê.

⁴Henaka na agua ga ahi igê ki roto, ngaigi ki asa vige hagagatagatanira tenia na maguha. Na barongoha mamagutaga ka tagitagi rihira, ma na marâ ga tonga na maata ga bâ arikuku ma ni anumanumaha ka vora me tangara.

⁵Na gi ki asa vige mavesira. Na higu mave ki asa vige mavesia na mengo ni mera ngekana.

⁶Na bagagi raha mamagutaga i tanga akê ma ngaia kani oga ma ki mavesira. Suria ngaira ka magu ngavê, tahema ngaira ka tongesuria, vi na marâ ga bâsigi ka bwera teharigi na morani na bâha renigi.

⁷Na raramohana na hagakoneha, ga hagabekasira na enoni renigi, ka arumakaka ma na aitangisiha ga migiparo ka vora re na rogaroga purua.

⁸Ngaira ka vi, vi ngaira ka girara ga hagamagahurugi râ na maguha ma na maeha tenia na enoni i maeha igê na aitangihana, ma ke bâ, i ngekê ngaira mareta ka mamasiaga renigi na maguha i pe tonga hunani.

⁹Henaka i mareha rârâ ta na marâ mamagutaga vige akê me tangara, ma ngaira ka bubununuga renira na ma ga hanahana ma na anima na marâ ga bâbâ marangata.

¹⁰Vikê ngaira ka mesi maguha. Ngaira ka magu vige bâsia na mengo ma ki bara tangara vige piringigi na maata.

¹¹Na tauhana na eraha ki magu ngavê ma ki suria so marena vi i era. Na enoni i tangahuria renia i hagarapera ta na marâ, ngaia ki takusia vi na eraha i katoa ki raha teharia na morana na eraha i katoa.

¹²Na enoni ki magu, suria ma i pe takotako maninga.

¹³Na enoni i pe hagêguritogo renia na giraraha iana, ngaia ki aganaria na maguha, suria i pe hagare.

¹⁴Na enoni hato ngegana ka mauru ka tâtâ horota suria i susu na mengo ngekana, henaka vi ngaira ka pe oga i ruguhana na ramoha iana, suria i râ me tenigi na rutuni na agua iata na ani ga bani me ma ngaia ki pe nahuni ramoha.

¹⁵Na marâ ga bâ mamagutaga ka tarigenira. Ngaira ka magahugahu renia na maguha, suria na bubununuganiha ki hagagasuganira ma ki angarira.

¹⁶Na enoni ka gasuga ni votavota ma ka so nga i ngegana i manga vi na maguha ki rakura so igê.

¹⁷Henaka na enoni i tagara i mu ma na ani i bâbâsuria na togoha ma na ani i tagara rârâ ma igê na masusu, ki tagenana ma tangara ngaira hato. I asa vige tahi tenia. Na mengo ki rakura ngaira hato tagenata.

¹⁸Ngaira ka magahugahu ma ka bubununuga ngavê, renia na roga ki angi huhu, se renia na manu ka heangisi igê na apinige, se renia na aogana na ve i maganu, se renigi na aogani na hê ga apuripuri, se renigi na akurukuruhata na marâ ga pe bâsira, se renigi na nguruhata na marâ vasiga, se renigi na rongoha ga tagitagi igê na hungani.

²⁰Na maveta hagenani ki mave bâkoro ma na tagaraha ka tavoraha purunguni,

²¹nga noga ma na enoni ngegana kani baraira na bungiana i roto hono. Ngaia ka na nununa na mengo ni mera i tâ tangara. Ngaira ka higera so mareta teharia na mengo.