Read Kahua AITANGISIHA 18 Bible Online

AITANGISIHA 18 - Kahua bible

AITANGISIHA 18

¹Henaka, ma na marara mave ki takirira na kariamu, God. Na merongata ka rongogi na ringeta ma ki bara vige bâsira. Ngaira ka visira viga babarisi, suria ga pe mamasiaga.

²Ngaira ka visira koro, suria na enoni ga bani hagamamasiagara i nago, ka pe hagamamasiagara bê aporo i ngekê ma ka vi tangara nga na kariamu viga huhura.

³Hemuri igo ko bêngenira na kariamu renia na u na gi i vavata, matena ga râ igê na tara ga pe hagarea. Na u na gi ki manga na arito, i pe singira igê na râha ni ageageha iata.

⁴Ma na merongata ka pe oga igê na marara, suria na mengo ki araria i hagatotongora ararira, suria ngaira ka bani hagatotongora na kariamu, ga page hagatarêngenia na marara hagahu na ramata tanga na maveta.

⁵Matena na merongamu Araha ka râ suria na katoha iata, hanana ga nahuira ka me na kareta na kariamu, na ani gitage na kare kenana i pania tarege râ ki tahi. Igo ko hagaitangira na merongamu, renia go hagamesira rako era na kareta ngaira mareta, ma ka tono ka me igê na matena gi tage na mane ni me hato iata igê na asi i anuira.

⁶Na êvarimami ka bani rongoa hagenago, vi na ta kani page akê me igê na bungiana ngekana, hanana ngaira ka obakoro ma ka ape nganganihaga renigi na suruha iamu tangara, ga hagêguritogo renigi.

⁷Na kariamu ka bani girara, vi igo ko hagatahira na enoni ga toto surigo ma ko mutera na merongata.

⁸Na tauhamu i hagaitangira na merongamu kani kasigami akê, suria go ategami tangago maremu.

⁹Igê na mateni ngegana na mane koro i berarogata na kariamu ga toto surigo ka vogasi pinihi ma ka heaganari viga marupegi na ramata iamu ma ka hagehaku. Naka ma igê na koroha se na mamasiaganiha ngaira ka kirigi igê na bani ki ni hagarahasiha iata na êvarita.

¹⁰Na merongata ka angi maramara renira na kareta ga me, ma na enangita iata ka tagitagi igê na ara ni agua, suria i rugu ngavê na obata.

¹¹Na hagaitangiha gi tage togo ma ki tarahura tagenata na kare rakuraku ma na avanuta na enoni tokora ma na maneraha iata.

¹²Na gahuata ki bara vige tomanigi. Na enoni ga tahi ka pe rako, hanana vige bagigi ngaigi hato. Igê nga na kere matena ngekana na kareta ga takuira ngavê ka me. Ngaira ka me igê na tarana gi tage ma.

¹³Na enoni ngegana ka pe botage rârâ vige hinaru ma ka hagêguritogo ma hete renia na ramoha ni girarasiha. Ma na matena ga meme igê o kareta hagenago, ngaira ka kahu tahetara, vi na Isiraelita ka na karena God.

¹⁴Matena na ara ni marâ ki mangumanguaga ngavê ma na bungiana ki arâ rêrê ma ki hatani gupu ni bungi,

¹⁵na tamasinga raramohaga hunia iamu ki râ me tenia na vavearo, tenigo Araha go oga igê na atohamu, ma ngaia ki parama ma ki reke râ manga na mane ni me ramo i gupuna na agua i asa vige tahi.

¹⁶Ngaia ki têa na tatapa borahu i mamaniniaga, i vi, vi na bonasiha ramo iamu. Ngaia ki ura i ano ma na bêna ki puru kê i vavearo ma ki tokorenia rârâ na memeta igê na agua.

¹⁷Igê nga na matena ngekana na enoni ga sugi meme ka magu hunira, suria ga bagamamêru ma na maguha raha ki parama ma ki angarira.

¹⁸Ngaira ka vota so hetatari ma ka sugi meme noga ma ka vi tanu hega igia kaniga meme.

¹⁹Na bagamamêruha iata ka bani hagagirarara, vi tanu hega kaniga me, hanana siana ka pe girara, na ta kaniga me renia.

²⁰Nikâ na mera ki tarahura na kariamu suria na ringa ki nahuira rako na hitangita ka me igê na bagamasusu raha. Ma igo ko pe mangariaga borahu tangara,

²¹suria ta na mane i pe tasi rârâ kani hatani rohe pusira renigi na tarure iana. Ngaigi ka na avarasiha ma na sungiha ni marâ i sigini koro, suria ngaia ki na mane ni vogasiha ma ki avarasigo, hanana go bonotenigi na tasi iata. Ngaia ki hagamauga na mangariaganiha iamu ma ki hatungia na bagabevoana ngekana. Vikana ngaia ki hagabângenia vi ngaia ka na kariamu monari.

²²Ngaia ki teharia na bagabevoana ngekana mareha vi suria na ramoha iana marena se vi surigi na tarure iana ma surigi hete na avarasiha iana. Vikana ngaia ki hatungia na hagaitangiha iamu tangara, suria i hagatakusigo renigi na suruha iamu tangara na êvarimami ma na suruheri iamu henira.

²³Matena ga bani haripage noga na gahuata, ngaia ki ura banu ki urapusia na mangariaganiha iamu ma ki hagabarasia, siana ki mutera nikâ na ani ga tahitahi mêngara.

²⁴Na girarani na marâ hato i maveta ma i vavearo kani igê na tuguni borahu iana. I parematona ka oga igê na harahara ge he na hê ga oga igê tonganigi na atata na êvarimami hegitigi. Ma igê na gahu i baraia renia na bêna ki oga igê na hê na mahe i bâkoro ngavê, na giraramu Araha.

²⁵Na angero ni mera ki magutenigi na marâ ngegana ma ki rumakaka. Ngaira ka hatamia râ sisite ma na mangariaganiha iamu ma ki uhu noga.