Read Kahua AITANGISIHA 19 Bible Online

AITANGISIHA 19 - Kahua bible

AITANGISIHA 19

¹Tangara na enoni ga pe botage renigo, Araha, na mangariaganiha iamu, i pe hetaki, ki hitarira ngavê. Igo ko bani giraragi hagenago, vi na ta kani ngaira ga page katogi.

²Igo ko bani girara, vi ngaira ka page urisi parongata ma ka page tarigenira na kariamu nikâ, henaka ga nakara vê ka arâ ma ka tugurira ka hatani huhura.

³Matena ga angisira mênga na kareta ga me ma ka angiangi maramara igê na anoanota, ta na takoha bekabekaga ki râ me igê na aitangihata. Henaka ga tugurira ka hatani hura, ma ngaira ka haganega ka tarigenira na kariamu manga vi ngaira ka gava.

⁴Na gunaha iata ki katora vikana ma ki bugurenira tanga na hagaitangiha i ararira. Ngaia ki katora ka bonotenigi na mamasiaganiha ga bani tarahura i nago, hanana viga hatamia na hagaitangiha i hagatonganigi kê nikâ na ani ngegana.

⁵Ngaira ka me igê na tarana i tora getea ngavê ma na kariamu ka ama ni tavoraha asitatara nga hete.

⁶Na ara ni marâ i maveta ka urusigi na tauhani, suria go bonasigi vigana, hanana na kariamu ka asitatara.

⁷Ngaira ka bâsia na vaha puru, i râ me ki buhia na tênga iata ma ka bâsia na tara mamata i vaga me igê na agua i oga i nago igê na asi. Na Asi Memera ki vora re na tara manamanaga. Na asi ramo ki vora re na bena ni go.

⁸Na kariamu hato ga oga i na ababa ni rimamu ka bâsia na mena iamu ma ka tarê tanga ta apanena.

⁹Ngaira ka mangara na hosi igê na pariki ni go. Ngaira ka asireke rârâ mangara na kareta na sipi, matena ga ki ka hagarahasigo, Araha, suria go hagatahira.

¹⁰Ngaira ka takusia mênga na bani ogaha iata, matena ga kare rakuraku mênga, ma manga i he na ano ki hagarakonira na namu ma manga i he na ve ki momoatenira na bera ma na bera na êrê ma ki mareha vi na ega.

¹¹Hemuri, matena ga pasi ngê na ganiani koro ngavê, ngaira ka bâsia na tarana haoru ga vora me renira na manu,

¹²suria na manu ka hura me tenia na asi, hanana ga hatungia na magêha iata. Na mane ngegana ka pe bani bâsira me i nago.

¹³Na ania ka hagananêra na enoni tasi ngegana renia na hgaitangiha i page tarahura. Ngaira ka mamasiaga meni na bagatauhata, suria ngaira ka ruhira ngavê na mahuara.

¹⁴Na agua getera ka usitenira na enoni ga pe girarara, na mahuara ga arâ me i pasita, ma ngaira ka katora ka kare rakuraku iata na mahuara ga koro tangara ma ka tamanira.

¹⁵Na hagaitangiha ki page tarahura na enoni hato, naka ma o ti, ga pe unira banu na mahuara.

¹⁶Ma na enoni ngegana, ga unira banu hagenago na mahuara tanga na magotoha ma ka katora ka tagenata henira, ngaira ka hagamamasiagara ngavê hagemuri.

¹⁷Tahema na enoni ngegana ka oga igê na mengo meni na bagatauhata mangara na me ni Sotome i maani ruma iana o Loti na mane koro. Na mengo ki baraira ma na ara ni hitangita ki arâ tatagara rârâ tanga na ruma iana marena.

¹⁸Na ara ni varo igê na gita ki nahunia na ringena marena ma na matena ngaigi ki akê me haku na ringeni ka rongorongo hehegitigi ma ka arâ kasikasi. I tagenana ma igê na mateni ngegana, matena na marâ ka akê me haku igê na tarani ga tora getigi tenia i nago.

¹⁹Bâ, na marâ mamauri i bemu ka vora re na ega ma na ega ka vora re na marâ mamauri i bemu.

²⁰Na raramohana na gi ki teharia na raramohana na ve, suria na ve ki bara vige sirihia na gi.

²¹Na vavatani na gi ki asa vige haganoroa na hasigota na marâ mamauri ga girara ga titihu, henaka ngaira ka arârâ igê. Ma na gi ki asa vige hagamagahurua na ngêra God i hagatorangenia me. Henaka ma ngaia ki magahuru manga na kârupu igê na bababana manga bani hanana, ma i ngekê ki mareha.

²²I monari, Araha. Igê na ara ni tarani igo ko bani hagarakonira na kariamu ma ki rongo raha na atata. Igo ki asa vigu rumakaka renira. Igo ko bani tamanira tare ma i na ara ni agua.