Read Kahua AITANGISIHA 3 Bible Online

AITANGISIHA 3 - Kahua bible

AITANGISIHA 3

¹Na atarota na enoni ga toto suria God ka oga i rimana God ma ki asa vige hatamigi na mamasiaganiha.

²Tangara na enoni bonobonoga ngaira ka bani me ma na mera iata ki erataga ngavê.

³Ngaira ka magahuru panigia ma ki mareha vi na hatungina tangara. Na enoni koro ka oga hete igê na marapeha.

⁴Tangara na enoni ki bâ manga vi na hagaitangiha ki tarahura, ma ngaira ka tako togo ngavê vi ngaira ka pe meme.

⁵I murina na hagaitangiha abubu ngaira ka page nahunia na marâ i koro teha ngavê, suria God ki uhungira ma ki tarahua vi ngaira ka araria.

⁶Ngaia ki uhungira manga ga hagamatarotaroa na golo renia na gi ki taranina, ma ki aganarira manga i aganarira na enoni ga susu tanga.

⁷Igê na matena God ki surira na enoni koro ma ki vurira, ngaira ka page vavata manga na gi i raboa igê na go maria.

⁸Ngaira ka page surira na enoni hato i maveta ma ka page marungira. Ma na Araha ki page Araha raha iata tare ki bê ki arâ.

⁹Na ani ga tako togo renia na Araha ka page aitangisia na monariha na tauhana. Na ani ga toto suria ka page oga igê na hetakuiha iana, suria ngaia ki koro ma ki hetaki tangara na ani i bani atera.

¹⁰Tangara na enoni ga pe botage renia God ki page tarahura na hagaitangiha meni na bagaitangihata, suria ngaira ka haritohea na Araha ma ka ruhira na enoni ga toto suria God.

¹¹Tanga na enoni i usitenigi na takoha mataha ma na hagaotonga koro, na ogaha erataga ki tâtâ nanêa. Ngaia ki nanasi hagaborâ ma ki tagara bâraha purua ma. Na tagaraha iana ki asa vige akê me bâkoro.

¹²Na gete i auragia ki page tabaga ma na kareterua ka page oga sutaga. Na enoni ka page arangenira na raraha iaterua.

¹³I babarisi na gete i gomara, manga vi ngaia ma ki pe gamogamo rârâ. Igê na tangiana ni suriha raha God ki page korokoro tanga ma ngaia ki page vagevage ngavê.

¹⁴I babarisi na mane na voemavo, suria God ki page haganahunia renia na vagevageha, manga vi ngaia ma ki pe aharêngigi rârâ na ramata ma ki pe mangariaga i obana tanga na Araha. Igê na tangiana ni suriha raha ngaia ki page nahunia na mena na totosuriha iana i teharia vige apara kare: ngaia ka na agua i pasina na Araha God.

¹⁵Na ogaha koro i maana God ki manga na apinige i rasirasi na guani ga koro ngavê. Na takoha mataha ki manga na vagana na apinige ki mauri ma ki girara i papêhu tare.

¹⁶Na kare igê na gamogamoha se na kare ni tara ka page meme buta.

¹⁷Ma ki manga ga mauri arihu, na enoni ka page bâbâ so renira ma ki asa vige hagahigasira, henaka ga gemêa.

¹⁸Ma ki manga ga meme buta, ngaira ka page raruni baguru ma ka page obaera igê na tangiana ni suriha raha.

¹⁹Na hatungina tangara na kare ni tara ki eratage ngavê.