Read Kahua AITANGISIHA 4 Bible Online

AITANGISIHA 4 - Kahua bible

AITANGISIHA 4

¹Na ogaha koro i maana God ki koro teharia vige apara kare, suria God ma na enoni ka page ama ni takusia tare nga na ogaha koro.

²Na ogaha koro i maana God ki na hagararinga tangara na enoni, hanana ga arâ suria. Manga i pe gâga na hagararinga ngekana, na enoni ka tangasia. Na ogaha koro ngekana ki tehateha tare ki bê ki arâ. Ngaia ki tongatonga renia na tarepuri ni tehanga, suria i teharigi na ara ni korohata na enoni.

³Henaka ga rakorako na kare ni tara, ngaira ki asa vige akê me bâkoro, suria ngaira ka na kare ni tara nge. Ngaira ka mangagi na vagani na apinige ga pe kanu ma ka pe nahunigi na hunani nganganihaga igê na hakuta ninuni.

⁴Ngaira ka mangagi na apinige ga pe kanu na vagani. Henaka ga papêhu sisite râ, ngaigi ki ababarere igê na roga ma na roga raha ki bogegi, suria ga pe nahunigi na hunani nganganihaga.

⁵Na arani ka babaro agani, matena ga sisite mêngagi. Na guani ki asa vige mata. Ga pe arari ni ngêra se vi na ta.

⁶Igê na tangiana ni suriha raha na kare ni tara ka page ranganigi na bagatauhata na enata ma ka page tugurira.

⁷Na enoni ga koro i maana God ka page mamaro, henaka ga meme karekare.

⁸Igia ka hagahigasira na gemêa, mareha vi suria ga mauri arihu me noga se vige rako na harisi iata. Mareha.

⁹Na gohogohoraganiha ki vi aitangisiha ma na gemêaha ki vi na ogaha koro i maana God.

¹⁰Bâsia o Enoke. Ngaia ki hagakoro obana God ma God ki takuia. Ngaia ki oga i berarogata na enoni tasi ma God ki torea vê,

¹¹i era ma na eraha ki hagaerasia na aitangihana se vi na hagahagaparunga ke hagatasia na atarona.

¹²Igia hato ka bani girara, vi na eraha ki girara i hagamura ngavê na enoni, hanana ngaira ka pe girara vi na ta ki koro, henaka ngaira ka bâsia re maata. Na teniha era ki girara i angaria na enoni koro ma ki girara i hagaerasia ngavê na aitangihana.

¹³Henaka o Enoke ki pe mêri arihu ma ngaia ki bani koro teha ma na enoni getera ka obanigi rako na harisi tanga viga korokoro teha vikana.

¹⁴Na Araha ki obakoro renia na ogaha iana o Enoke tahema ngaia ki hatani torea vê hura tenia na maveta erataga ngekê. Na enoni ka girara na tarana ngekana ma ka pe tako mataha renia. I bâ manga vi ngaira ki asa ngavê tangara vige girara,

¹⁵vi God ki koro ma ki hetaki tangara na kariana ma ki anumasira na ani ga hagakoro obana.

¹⁶Na enoni i koro na ogaha iata i maana God ma ka bani me hunu, ngaira ka hagamakira na enoni erataga ga gâga mêngara. Na enoni na gapu haoru ga bani koro teha ka hagamakira na gemêa erataga.

¹⁷Na enoni ni takoha mataha ka meme karekare vari, ma na enoni era ki asa vige aitangisia vi na tauhana na Araha ngekana ki torera vê hanana i hagatahira.

¹⁸Ngaira ka tamasi hagaru renia na mera iana na enoni ni takoha mataha, ma na Araha ki sugi rurusira. Matena ga meme, ka atani bagira mavê ma na enoni ga bani me ka page meramarabe ma ka page makimaki tenira.

¹⁹God ki page rahutenira so ngurira i ano ma ki asa iata vige tamasi. Ngaia ki page ngingira manga na nunu i ngingia na ruma ki aruhuruhu. Ngaira ka page oga igê na mamasiaganiha raha ngavê. Na enoni ka hatani hitenira ngavê.

²⁰Ngaira ka page tatata, matena ga arâ me tanga na suriha raha. God ki page tamasigi na tasi iata tangara. Na bagatauhata mareta ka page ranganira.