Read Kahua AITANGISIHA 5 Bible Online

AITANGISIHA 5 - Kahua bible

AITANGISIHA 5

¹Igê na tangiana ni suriha raha na enoni koro ki page takotako togo, matena i rêra i maata na ani ga hagamamasiaga apena ma ka memarabe renigi na tagaraha raha iana.

²Ngaira ka page konetenia, matena ga bâsia i tahitahi. Ngaira ka page tatata ma ka page bubununuga ngavê.

³Ngaira ka page tangahurira renigi na bagatauhata ma ka page kasikasigi na obata, suria ga anumanuma. Ngaira ka page hetamatamasi, ka vivi:

⁴“Na mane ga rurusia ea ngekana, ga vi ma viga mehagaru. Igia ka beka ngavê! Igia ka vi ma, vi na tauhana ki râ bekabekaga ma na matena i me igia ka pe hagahigasia.

⁵Ma ke bâ! I ngekê ngaia ki na hitangita o karena marena God ma ki nahunia na atohana i berarogata na kariana God.

⁶Igia hete kaniga hagatasia na tara ni monariha. Na arito ni ogaha koro ki pe raboa tangagia ma ki pe mavesigia.

⁷Igê na ogaha hagenani iaka igia ka râ suria na tara ni eraha. Igia ka aharêvoro igê na bagamasusu raha i mareha igê na tara, i mareha vige râ suria hete na tara na Araha i obanigia tanga. Na eraha iaka ngekana ki erasigia ngavê.

⁸Manga i he kani tamanigia na paroparoha iaka? Igia ka ageagesigi na ruruguha iaka. Manga i he kaniga tamanigia?

⁹Ngaigi hato ki magahuru manga na mamaru i riri se ta na rongoha ga rongoa ma ka hatani bonotenia ngavê.

¹⁰Na haka ki vorovoro asi igê na avoa, ma na matena i bani arâ, ki asa vige bâ peregana se vige vi, vi na agua i râ igê kani akana.

¹¹Na manu ki gaha i bevoa ma ki asa vige bâbâ peregana. Ngaia ki gaha, suria na gagahana ka kavokavo igê na roga. Ngaia ki taritari vausi ma ki asa vige bâbâ peregana.

¹²Na mage ki gaha tanga na bubusikare. Ngaia ki tarasia na rogaroga, i takutaku i muri ma ki asa vige bâbâ peregana.

¹³I tagenana ma nikâ igia. Igia ka voravora me ma hemuri ka magahuru. Igia ka pe hagabângenia na ogaha koro. Mareha rârâ vi na pereperegana. Na eraha iaka ki hagamagahurugia ngavê.”

¹⁴Na takotogoha iata na enoni erataga ki manga i he? Ngaia ki manga na momogani na go maria na roga ki ahegenigi râ. Se i manga na robona na asi na roga raha ki tahusingenigi râ. Se i manga na robona na gi i aheahe râ renia na roga. Se i manga na kere takusiha i gaha me ma ki magahuru râ. Se i manga na enoni i gâga henigo suria râ ma na tangiana gi tage.

¹⁵Ma na enoni ga hagabângenia na ogaha koro i maana God ka gâga hagahu hete ma na Araha ki page vurira bâkoro. God raramohaga hunia ki page marupera bâkoro.

¹⁶Ngaia ki page kasira akê ma ki page nakagi na tarepuri bâkoro i bêta, suria ga koro teha. Ngaia ki page anumasira ma ki page ngahingahi pusira renia na raramohana.

¹⁷Igê na togeaganiha iana ngaia ki page tangaru ma ki page hagatangarugi na marâ i bani hagavoragi, hanana ga hagaitangira na merongana.

¹⁸Na otoha ka na kapa pusia na matona. Na suriha oto iana ka na rarasê na kapa.

¹⁹Na parongana koro ngavê ka na bêata i tehateha tare.

²⁰Na mangariaganiha raha iana ka na tatapa borahu i bani mamaniniaga. Na ara ni marâ hato i bani hagavoragi ka page haku henia ka meraheariha na ani ga beka ka merongasia.

²¹Na anina i asa vige atara ka page suhira na merongana. I bâ manga na vaha ka mangagi na epage ga hanatenigi na mage.

²²Na mangariaganiha iana ki manga na hêsigogo, i sigohenigi na hê na rangi ka takera na merongana. Na asi ma na ve ka page tarira ma ki asa vige hetaki.

²³Na roga raha ka page ahegenira râ manga vi ngaira ka na marusini na rê. Na aharêngiani na ramata ki page ruhuruhua na maveta hagenani. Na ani ga nahuni ramoha ka page vota renigi na bagatauhata.