Read Kahua AITANGISIHA 6 Bible Online

AITANGISIHA 6 - Kahua bible

AITANGISIHA 6

¹Hoita, igamu na maneraha mu rongo. Igamu mu nahuni ramoha suria na maveta mu karinga. Mu karinga maninga hanana mu nahuni aitangisiha.

²Mu rongo, igamu mu marungigi rako na agua ma kamu ageage suria ga rako na enoni i ruguhami.

³Na ramoha iami ki râ me tenia na Araha God raramohaga hunia. Ngaia ki page haharirigi na tauhami ma na katoha iami.

⁴Igamu kamu hemarungi urusia God ma kamu bâsuria na arahanga iana. Vikana, manga mu pe hemarungi igê na otoha, manga mu pe marupegi na ramata, manga mu pe mauri suria na obaniha iana God,

⁵hoi, God ki page hatani hagaitangigamu ngavê, suria na suriha ki raharaha nga tangara na ani ga nahuni ramoha.

⁶God ki takira na enoni tokora ma ki bonotenigi na bagatauhata ma tangara na ani ga nahuni ramoha na suriha ki raharaha nga hete tangara.

⁷Na Araha God ki pe magutenia rârâ ta na enoni, henaka vi oga igê na tagaraha raha. Ngaia marena ki hagavorara na enoni hato, na ani ga nahuni ramoha ma na enoni tokora, ma ki marupera tagenata.

⁸Ma na suriha ki page haharirigi maninga na ogaha iata na ani ga nahuni ramoha.

⁹Maneraha, na tamasinga iaku ki tangagamu igamu, hanana mu nahuni aitangisiha ma kamu pe tasitasi.

¹⁰Na tarani ngegê ka râ me tenia God ma ki tuguhigamu vigamu katogi vigana. Vikana na suriha ki page ranganigamu vi igamu kamu koro ma kamu oto vari i maana God se mareha. Manga mu katokato vigana, igamu kamu page girara vigamu roherohe maninga pusigamu maremi.

¹¹Hoi, mu nakagi na tamasinga iaku i obami ma kamu ageagesigi, hanana mu nahuni aitangisiha.

¹²Na takoha mataha ki mave bâkoro tare ma ki asa vige page soso. I mataku ma tangara na enoni, hanana viga tarahua, manga vi ngaira ma ka takuia ma ka garia.

¹³Ngaia ki hatani hagagirara marena tangara na ani ga rapasia.

¹⁴Manga go bani riterite i mavoraro, igo ko page tarahua so ma i maani ruma. I mareha ge bara.

¹⁵Manga na takoha mataha ma ki tâtâ nga i obamu, igo ko bani nahunia noga na aitangisiha raha. Manga go riteritehia, igo ki sugi hatara na obamu.

¹⁶Suria ngaia ki obanira na ani ga araria, ngaia ki page tarahugo, naka ma i he. Ngaia ki korokoro tangago ma ki tamanigo igê na ara ni takoha iamu.

¹⁷Na takoha mataha ki haganega igê na matena go rapasia maninga na hagesuringa. Manga go rapasia na takoha mataha, ki vi go takuia.

¹⁸Manga go takuia, ki vi go marupegi na ramata iana. Manga go marupegi na ramata iana, ki vi i asa vigu meme.

¹⁹Ma na tarana vi igo ko pe meme, ki torego i pasina God.

²⁰Na rapasiana ni takoha mataha ki hagarêgo tanga go marungira na enoni.

²¹Igamu mu marungigi na agua, manga mu ageagesigi na atohami ma na bâhanami ni ramoha, hoi, mu hagahigasia nga na takoha mataha, hanana mu hemarungi hagahu.

²²Inê be hagarongogamu renia na ta ka na takoha mataha ma manga i he kani voravora me. I asa be pinihia ta na marâ renia tenigamu. Inê be sihongenia haganego me tenia na matena God ki hagavorara na marâ hato. Na aitangisiha iaku renia be naka mave tangara na enoni hato. I asa be page reke aharêngia tapanena na monariha.

²³I asa be memaongo na aitangisiha iaku, suria na tarana vikana ki pe araria ngavê na takoha mataha. I mareha vê!

²⁴Manga ga rakorako na enoni ni takoha mataha, ngaira ka girara ga hagatahia na maveta. Na maneraha i tako mataha ka na ramana tangara na enoni.

²⁵Hoita, mu karingê maninga, matena gê hagesurigamu, hanana i tamanigamu.